काठमाडौ‌ं,कार्तिक १८ –

वैकल्पिक राजनीतिक शक्तिका रुपमा दाबी गरेको विवेवशील साझा पार्टीले आफ्नो चुनावी प्रतिबद्धतापत्र सार्वजनिक गरेको छ। विवेकशील साझा पार्टीले अन्य राजनीतिक दलहरु सीमित कार्यकर्ताको स्वार्थमा राज्य स्रोतको दुरुपयोग र चरम दोहनमा सक्रिय रहेकाले आफूलाई भोट दिनुपर्ने दाबी प्रस्तुत गरेको छ। विवेकशील साझाले प्रत्यक्ष निर्वाचित कार्यकारी प्रधानमन्त्री सहितको शासकीय स्वरुपको मुद्दालाई जोडतोडका साथ उठाउने जनाएको छ।

जनताको विकास र समृद्धिको आकांक्षा परम्परागत दलहरुबाट सम्बोधन हुन नसक्ने विवेकशील साझाको घोषणापत्रमा उल्लेख छ। यही राष्ट्रिय आवश्यकताका कारण विवेकशील साझा पार्टीको जन्म भएको घोषणापत्रमा लेखिएको छ।

लोक कल्याणकारी र समावेशी राज्य आफ्नो प्रतिबद्धता भएको विवेकशील साझाले घोषणापत्रमा उल्लेख गरेको छ।

‘पुराना पार्टीहरुले आफ्नो स्वार्थ अनुकुल पद्धतिलाई तोडमोड गर्दै सञ्चालन गरेका छन्। आफूले चाहेजस्तो नभएमा संसद र सडकमा बन्द–हड्ताल गर्ने चरित्र पुराना दलहरुका देखिएको छ,’ घोषणापत्रमा उल्लेख छ, ‘विवेकशील साझाले बन्द–हडताल गर्नेछैन।’

उसले पार्टी र राजनीतिक क्रियाकलापलाई पारदर्शी बनाउने दाबी गरेको छ। इमान्दार, निष्ठापूर्वक राजनीतिमा सक्रिय हुने, उत्कृष्ट व्यक्तिलाई राजनीतिमा सक्रिय गराउने र सबै क्षेत्रका मानिसलाई समानुपातिक सशहभागिता गराउने घोषणापत्रमा उल्लेख छ।

उच्च आर्थिक वृद्धिका लागि विशेष योजना सञ्चालन गर्ने, सहकारी, नीजि र सरकारी क्षेत्रको समन्वयमा विकास योजनाहरु सञ्चालन गर्ने, भौतिक पूर्वाधार विकासलाई प्राथमिकता दिने र २०७२ सालमा भुकम्पबाट क्षति भएका निजी सम्पत्तिको क्षतिपूर्ति दिने विवेकशील साझाको घोषणापत्रमा लेखिएको छ।