सुजन पण्डित

चितवन,कार्तिक १८-

राप्रपा(प्रजातान्त्रिक) चितवनका अध्यक्ष बद्री तिमल्सीना माओवादी केन्द्रमा प्रवेश गरेका छन् । आज चितवनको माडीमा आयोजित एक कार्यक्रम मार्फत उनी माओवादीमा प्रवेश गरेका हुन् । उनलाई माओवादी केन्द्रका अध्यक्ष प्रचण्डले अभिर र माला लगाएर स्वागत गरेका छन् । उनिसंगै राप्रपा (प्रजातान्त्रिक) का ३१ जना माओवादी केन्द्र प्रवेश गरेका हुन् ।

सार्वजनिक कार्यक्रममा सहभागी हुन माओवादी केन्द्रका अध्यक्ष प्रचण्ड दोस्रोपटक माडी पुगेका छन् । तिमिल्सिनाको टोली माओवादीमा प्रवेश गरेपछि चितवन ३ मा प्रचण्डसँग चुनावी प्रतिस्पर्धामा उत्रिएका राप्रपा प्रजातान्त्रिक नेता विक्रम पाण्डे समस्यामा परेका छन् ।

उम्मेदवारी दर्ताको दिनमा समेत तिमिल्सिना लोकतान्त्रिक गठवन्धनका तर्फबाट अगुवाई गर्दै हिडिँरहेका थिए । तिमिल्सिना यसअघि कमल थापाको राप्रपा नेपालको जिल्ला अध्यक्ष थिए । उनी भरतपुर महानगरपालिकामा राप्रपाको तर्फबाट मेयरको उम्मेदवारसमेत थिए ।