चितवन, कार्तिक २१–

प्रदेश तर्फ चितवन निर्वाचन क्षेत्र नम्बर ३ (क) अन्तर्गत पर्ने विभिन्न छुट्टाछुट्टै तीन वटा वडामा नेकपा एमाले र नेकपा (माओवादी केन्द्र)को संयुक्त वडा भेलाले निर्वाचन परिचालन कमिति बनाउने निर्णय गरेको छ ।

मंगलबार बसेको वडा भेलाले आगामी मंसिर २१ गते हुने प्रतिनिधिसभा र प्रदेश सभा निर्वाचनको लागि वाम गठबन्धनका उम्मेद्वारलाई विजयी गराउन निर्वाचन परिचालन कमिटि बनाउने निर्णय गरेको हो । चितवन क्षेत्र नम्बर ३ (क) को निर्वाचन परिचालन समिति संयोजक शारदा कुमालका अनुसार वडा नम्बर ६, वडा नम्बर १९ र वडा नम्बर २० को संयुक्त वडा भेला बसेर आ–आफ्नो वडामा वडा स्तरीय संयुक्त चुनाव परिचालन समिति गठन गर्ने निर्णय भएको हो ।

भरतपुरको वडा नम्बर ६ मा डोलनाथ अधिकारीको अध्यक्षतमा बसेको बैठकले एक सय एक सदस्यीय निर्वाचन परिचालन समिति गठन गर्ने निर्णय भएको कुमालले जानकारी दिइन् । उक्त भेलाले चुनावी प्रचार–प्रसारको लागि गीतानगर बजारमा चुनावी सम्पर्क कार्यालय स्थापना गर्ने निर्णय भएको कुमालले जानकारी दिइन् ।

त्यस्तै, वडा नम्बर १९ मा जीवन घलेको अध्यक्षतामा बसेको संयुक्त वडा भेलाले ६० जनाको निर्वाचन परिचालन तथा तीन सय दुई जनाको निर्वाचन प्रचार–प्रसार समिति गठन गर्ने निर्णय गरेको छ । उक्त संयुक्त भेलामा नेकपा (माओवादी केन्द्र)का केन्द्रीय सल्लाहकार खुशीराम पाख्रिन, (माओवादी केन्द्र) भरतपुर १९ का ईन्चार्ज तीर्थराज घिमिरे, नेकपा एमाले महानगर कमिटिका सदस्य गुञ्जमान वि.क.लगायतले मन्तव्य राखेका थिए ।

त्यसैगरी, मंगलबार नै वडा नम्बर २० मा बसेको एमाले र माओवादी केन्द्रको संयुक्त भेलाले २१ सदस्यीय संयुक्त चुनाव परिचान कमिटि गठन गरेको छ । माओवादी केन्द्रका महाधिवेशन आयोजक समितिका सदस्य सुरेन्द्र गुरुङको अध्यक्षतामा बसेको बैठकले निर्वाचन प्रचार–प्रसारको लागि एक सय एक जनाको समिति निर्माण गर्ने निर्णय समेत गरेको छ । वडा भेलालाई सम्बोधन गर्दै चितवन निर्वाचन क्षेत्र नम्बर ३ (क) का उम्मेदवार कृष्ण भुर्तेलले चितवनको समृद्धिको लागि चितवन क्षेत्र नम्बर ३ (क) बाट आफूले उम्मेदवारी दिएको बताए ।

मंसिर २१ मा हुने निर्वाचनको लागि चितवन क्षेत्र नम्बर ३ ख का बाँकी नौ वटा वडामा बुधबार संयुक्त वडा भेला बस्ने जनाइएको छ । चितवनको निर्वाचन क्षेत्र नम्बर ३ मा प्रतिनिधि सभा सदस्यका लागि वामगठबन्धनका तर्फबाट नेकपा (माओवादी केन्द्र)का अध्यक्ष पुष्पकमल दाहाल तथा प्रदेश सभा निर्वाचनको लागि (क) बाट एमाले नेता कृष्ण भुर्तेल र (ख) बाट माओवादी नेता रामलाल महतोले उम्मेदवारी दिएका छन् ।

यही क्षेत्रमा लोकतान्त्रिक गठबन्धनबाट प्रतिनिधि सभामा राप्रपा (प्रजातान्त्रिक)का केन्द्रीय उपाध्यक्ष एवंम वन तथा भू–संरक्षण मन्त्री विक्रम पाण्डे र प्रदेश (क) मा काँग्रेसका दिनेश कोइराला र (ख) साजन कुमार महतो चुनावी मैदानमा उत्रिएका छन् ।