चितवन,कार्तिक १८-

आदर्श टोल विकास संस्था दिव्यनगरले भरतपुर महानगरपालिका वडा नं.२६ का ज्येष्ठ नागरिक तथा स्थानीय जनप्रतिनिधीहरूलाई सम्मान गरेको छ । नेपाली समाजमा अझै पनि जेष्ठ नागरिकलाई हेला गर्ने प्रवृत्ति पूर्णरूपमा हटिजसकेको भन्दै ज्येष्ठ नागरिकलाई सम्मान गरिएको समाजले जनाएको छ ।

‘वृद्धवृद्धालाई सबैले माया ममता दिएर सम्मान गर्नुपर्छ भन्ने उद्देश्यले हामीले सम्मान गरेका हौँ,’ समाजका अध्यक्ष बुद्धिप्रसाद भण्डारीले भने । कार्यक्रममा ४० जनाभन्दा बढी जेष्ठ नागरिकहरूलाई सम्मान गरिएको उनले बताए । साथै सोही अवसरमा ज्याकेट, टोपी, गलबन्दीसहित स्याउ, केरा, जुस, विस्कुटलगायतका सामाग्रीसमेत वितरण गरिएको थियो ।

सन्तानप्रति अभिभावकको माया र अभिभावकप्रति सन्तानको माया कहल्यै पनि टुट्न नहुने भन्दै समाजमा जनचेतना फैलाउनका लागि पनि यो कार्यक्रम आयोजना गरिएको संस्थाका सचिव तीर्थराज अधिकारीले बताए । समाजका ज्येष्ठ नागरिक भवानी प्रसाद भण्डारी प्रमुख अतिथि रहेको कार्यक्रममा भरतपुर महानगरपालिका वडा नं. २६ का अध्यक्ष ज्ञानप्रसाद खनाल, संस्थाका निवर्तमान अध्यक्ष बुद्धिबहादुर गुरूङ, वडा सदस्य गिता कुमारी शर्मा पौडेललगायतको उपस्थिति रहेको थियो ।

साथै कार्यक्रमको अन्त्यमा संस्थाको आर्थिक सहयोगस्वरूप गुरूङ भिजन प्रालिको प्रस्तुतीमा निर्माण गरिएको नेपाली कथानक चलचित्र ‘मायाको चिनो’समेत प्रर्दशन गरिएको थियो ।