काठमाडौँ,कार्तिक १७-

मंसिर १० र २१ गते हुने प्रदेश र प्रतिनिधिसभा सदस्य निर्वाचनका लागि दलहरुले समानुपातिकतर्फ बुझाएको बन्दसूची निर्वाचन आयोगले आज सार्वजनिक गर्ने भएको छ । आज सार्वजनिक गरिएका सूचीमध्येबाट प्रदेश र प्रतिनिधिसभाका समानुपातिक तर्फका ३३० जना सदस्य निर्वाचित हुनेछन् ।

गत असोज २९ गते दलहरुले बुझाएको सूचीका त्रुटी सच्याउँदै निर्वाचन अधिकृतको कार्यालयले बेलुका ५ बजेभित्र सूची सार्वजनिक गर्न लागेको आयोगका प्रवक्ता नवराज ढकालले बताए । प्रवक्ता ढकालका अनुसार समानुपातिकतर्फ आयोगमा प्रतिनिधिसभा तर्फ ४९ र प्रदेश सभातर्फ ५५ दलले बन्दसूची बुझाएका थिए ।

अधिकांश दलले बुझाएको बन्दसूचीमा त्रुटी भएपछि आयोगले सुर्धान कार्तिक १२ गतेसम्मको म्याद दिएको थियो । समानुपातिकतर्फ प्रतिनिधिसभामा १ सय १० र सातै प्रदेशसभाका लागि २ सय २० जना सदस्य चुनिनेछन् ।

निर्वाचन आयोगले दोस्रो चरणमा आगामी मंसिर २१ गते हुने प्रदेश र प्रतिनिधिसभातर्फ बिहीबार मनोनयन दर्ता गरेका उम्मेदवारमाथि आज विरोधको उजुरी दिने समय छुट्याईएको छ । उजुरीका लागि आयोगले बिहान १० देखि साँझ ५ बजेसम्मको समय दिएको छ । दोस्रो चरणमा प्रतिनिधिसभातर्फ १ सय २८ निर्वाचन क्षेत्रका लागि हिजो झण्डै १ हजार ८ सयले मनोनयन दर्ता गराएका छन् ।