चितवन, असोज २९–

नेकपा माओवादी (केन्द्र)का प्रभावशाली नेता रामबहादुर थापा ‘बादल’ चितवन क्षेत्र नं.२ बाट चुनाव लड्ने पक्का भएको छ ।

माओवादी केन्द्रले आज बुझाएको समानुपातिकको बन्द सूचीमा बादलको नाम नपरेपछि उनी प्रत्यक्षमै चुनाव लड्ने पक्का भएको हो । यसअघि नै उनी प्रत्यक्षमै चुनाव लड्ने तयारी गरेपनि बाम गठबन्धनको घटक नेकपा एमाले चितवनले जिल्ला अध्यक्ष कृष्णभक्त पोखरेललाई अघि सारेपछि कार्यकर्ताहरुमा अन्यौलता छाएको थियो । धेरैले बादल समानुपातिकमा पर्ने र पोखरेल नै चुनाव लड्न अनुमान गरेका थिए । प्रभावशाली नेता बादल भरतपुर–१० निवासी हुन् ।

यसअघि नारायणी अनलाईन डटकमले पनि चितवन क्षेत्र नं.२ बाट नै चुनाव लड्ने समाचार प्रकाशन गरेको थियो । बामगठबन्धनबाट चितवनमा माओवादीले २ र एमालेले एक सिटमा प्रत्यक्ष चुनाव लड्ने भएको छ । प्रतिनिधि सभाको निर्वाचनमा चितवन क्षेत्र नंं।१ मा एमालेबाट प्रभावशाली नेता सुरेन्द्र पाण्डे, २ मा बादल र क्षेत्र नं.३ मा माओवादी अध्यक्ष प्रचण्ड चुनाव लड्ने भएका छन् ।