आशिष उप्रेती,

चितवन, असोज ३०—

अगामी मंसिर १० र २१ गते हुने प्रतिनिधिसभा र प्रदेश सभा निर्वाचनको सुरक्षाका लागि म्यादी प्रहरीको भर्ना खुलेको दिनदेखि नै चितवनमा आवेदन भर्नेहरुको भीड लागेको छ ।

शनिबार पाँचौ दिनसम्म ३ हजार ५ सय जनाको आवेदन परेको जिल्ला प्रहरी कार्यलय चितवनले जनाएको छ । असोज २३ गतेदेखि ३० गतेसम्म म्यादी प्रहरीमा भर्ना हुन आवदेन खुल्ला गरिएको छ ।

शनिबार पाँचौ दिनसम्म ३ हजार ५ सयको आवेदन परेको तर १ हजार ६ सय ७८ जनाको दर्ता गरिएको र बाँकी दर्ताको क्रममा रहेको चितवनका प्रहरी उपरीक्षक दिपक थापाले बताउनुभयो । उहाँले म्यादी प्रहरीमा आवेदन दिनेको उत्साहले प्रहरीप्रति लगाव बढेको पुष्टि हुने बताउनुभयो ।

जतिसक्दो सहज तरीकाले बिहान ९ बजेबाट नै आवेदन दिन सक्ने ब्यवस्था मिलाएको चितवन प्रहरीको दाबी छ । तर, आवेदकहरुले भने व्यवस्थापन राम्रो नहुँदा दुई दिनसम्म लाइनमा बस्नुपर्ने बाध्यता रहेको गुनासो गरेका छन् । ब्यवस्थित तरीकाले आवेदन लिने काम नभएकाले समस्या परेको आवेदन दिन आएका अधिकांश ब्यक्तिहरुले बताएका छन् ।

आवेदन दिन हजारौंको संख्यामा उपस्थिति बढ्न थालेपछि जिल्ला प्रहरी कार्यालय चितवनले कार्यालय नजिकै अगाडि रहेको खुल्ला चौरमा आवेदन लिने ब्यवस्था मिलाएको छ ।