चितवन, भदौं २७–

दुई दिनपछि भदौं ३० गतेदेखि देशभर एकसाथ प्रदर्शन आउन लागेको बहुप्रतिक्षिति चलचित्र ‘जोनी जेन्टलम्यान’ को युनिट प्रचार–प्रसार गर्दै चितवन आईपुगेको छ । पूर्वी जिल्ला हुँदै बुटवल पुगेर चलचित्र निर्माण युनिट आज चितवनमा पत्रकार सम्मेलन गर्दै चलचित्र बारे जानकारी गराएको हो ।

आज नारायणगढमा आयोजित पत्रकार सम्मेलनमा बोल्दै चलचित्रका कार्यकारी निर्माता अजय मल्ल ठकुरीले दर्शकहरुलाई मनोरञ्ज प्रदान गर्ने उद्देश्यले नै चलचित्र निर्माण गरिएको भन्दै दर्शकको चाहना अनुसार नै चलचित्र बनेको बताउनुभयो । उहाँले दर्शकहरुलाई हलसम्म पुगेर चलचित्र हेरिदिन आग्रह गर्नुभयो । एक करोड भन्दा बढि लगानीमा चलचित्र निर्माण गरिएको भन्दै कार्यकारी निर्माताले चलचित्र स्तरीय बनेको बताउनुभयो ।

कार्यक्रममा बोल्दै चलचित्रका मूख्य भुमिकामा रहेका नायक पल शाहले यस चलचित्रबाट दर्शकहरुले भरपुर मनोरञ्जन पाउने बताउनुभयो । उहाँले चलचित्र हेर्न दर्शकहरुलाई हलसम्म पुगिदिन आग्रह गर्दै यस चलचित्रले नयाँ स्वाद दिने बताउनुभयो । उहाँले आफूलाई यस चलचित्रले यस क्षेत्रमा छुट्टै पहिचान दिलाउनेमा विश्वास व्यक्त गर्नभयो । चलचत्रिकी मूख्य नायिका आँचल शर्माले यस चलचत्रिमा माया प्रेमसंगै एक्सन समेत रहेकोले दर्शकहरुको चाहना पुरा हुने बताउनुभयो ।

यस चलचित्रको गीत ‘जब जब तिम्रो साथ’ अहिले सर्वाधिक चर्चामा रहेको छ । युवा पुस्तामाझ लोकप्रिय बनेका नायक पल शाह र नायिका आँचल शर्माको जोडीलाई दर्शकहरुले ट्रेलर हेरेरै मन पराएका छन् । पत्रकार सम्मेलनमा अर्की नायिका जैन कुवँरलगायतको उपस्थिति रहेको थियो । यस चलचित्रलाई नितिन चन्दले निर्देशन गरेका हुन् भने एन्ड्रयु पौडेलले निर्माण गरेका हुन् ।