एजेन्सी,भदौ २७ —

विश्वको सबैभन्दा ठूलो कार बजार रहेको चीनले डिजेल र पेट्रोलबाट चल्ने कार आफ्नो देशमा प्रतिबन्ध लगाउने तयारी गरिरहेको छ । उसले आफ्नो देशबाट त्यस्ता कारको उत्पादन र बिक्री वितरणमा समेत प्रतिबन्ध लगाउने योजना बनाइरहेको छ ।

देशका उप उद्योगमन्त्रीका अनुसार उनीहरुले यस कार्यका लागि अनुसन्धान गरिसकेका छन् । तर प्रतिबन्ध कहिलेदेखि लागू गर्ने भन्ने चाहिँ तय भइसकेको छैन । चीनले पछिल्लो वर्ष २ करोड ८० लाख ९२८ मिलियन० कारको निर्माण गरेको थियो । जसले पूरै विश्वको कारको एक तिहाई हिस्सा ओगटेको छ ।

बढ्दो प्रदुषण र कार्बन उत्सर्जनलाई कम गर्ने प्रयासका शिलशिलामा ब्रिटेन र फ्रान्सले पहिले नै सन् २०४० सम्ममा पेट्रोल र डिजेल कार आफ्नो देशमा प्रतिबन्ध गर्ने घोषणा गरिसकेक छन् । चीनको स्वामित्व रहेको भोल्भो कार समूहले जुलाईमा भनेको थियो कि, सन् २०१९ देखि उनीहरुका सबै नयाँ कारका मोडलहरु इलेक्ट्रिक हुनेछन् ।

कारका चीनिया मालिक जीलीको लक्ष्य सन् २०२५ सम्ममा १० लाख इलेक्ट्कि कार बेच्ने योजना रहेको बताए । रेनो—निशान, फोर्ड र जनरल मोटर्स लगायत विश्वभरका अन्य ठूला कम्पनीहरु चीनको बजारका लागि इलेक्ट्रिक कार विकसित गर्नमा जुटिसकेका छन् ।

प्रदुषणको समस्याको समाधानका लागि बनाइएका नयाँ नियमहरु लागू हुनुभन्दा पहिले चीनका बजारमा आफ्नो हिस्सा बनाउनका लागि कम्पनीहरु होडबाजी गरिरहेका छन् । उनीहरु सबै सबैभन्दा ठूलो बजार रहेको चीनमा आफ्नो स्थान पहिलो बनाउनका लागि सक्दो प्रयास गरिरहेका छन् ।