काठमाडौं भदौ २५ –

नेपाल कम्युनिष्ट पार्टीका महासचिव नेत्रविक्रम चन्द्र ‘विप्लव’ले माओवादी केन्द्रका अध्यक्ष पुष्पकमल दाहाल ‘प्रचण्ड’लाई सन् १९५४ ताकाका निकिता खुस्चेभसँग तुलना गरेका छन् । उनले प्रचण्ड र पूर्व माओवादी नेता बाबुराम भट्टराई दक्षिणपन्थी बाटोमा हिडेको आरोप लगाए ।

आइतवार काठमाडौंमा आयोजित एक कार्यक्रममा नेता विप्लवले प्रचण्डलाई सोभियतसँघकालीन खुस्चेभको बाटोमा हिडेको आरोप लगाएका हुन् । सन १९५३ मा स्टालिनको निधन भएपछि खुस्चेभ सोभियत संघको कम्युनिष्ट पार्टीको नेतृत्वमा आएका थिए ।

उनले पार्टी र राज्यमा आफ्नो निर्णायक नियन्त्रण कायम गरीसकेपछि सन् १९५६ मा भएको पार्टीको २० औँ महाधिवेशनमा संसोधनबादी लाइन ल्याएका थिए । त्यसले विश्व कम्युनिष्ट आन्दोलनलाइ गम्भीर विचलन तर्फ धकेलेको कम्युनिष्ट पार्टीहरुको विश्लेषण छ ।

अहिले मुलुकको राजनीति दुइ धारमा रहेको उल्लेखगर्दै विप्लवले यथास्थितीवादी, जनविरोधी, दक्षिणपन्थी र आत्मसमर्पणवादी धारको दिशामा प्रचण्डहरु लागेको उनले आरोप लगाए ।

उनले आफूहरु भने जनताको अधिकार र राष्ट्रिय स्वाधिनताको पक्षधर रहेको दावी गरे । विप्लवले क्रान्तिलाई स्वीकारेमा मोहन बैद्य किरणसँग पार्टी एकता हुन सक्ने बताए । ‘क्रान्ति हुन्छ भन्ने कुरामा सहमत भए किरण दाइसँग एकता हुन सक्छ, प्रचण्डहरुसंग कदापी हुँदैन’ उनले भने । यसअघि प्रचण्डले पार्टी एकताका लागि विप्लवसंग पटक पटक आह्वान गर्दै आएका छन् ।