भुक्तानी सेवा प्रदायक इसेवाबाट कुनै पनि सदस्य बैंकको किस्ता नि:शुल्क तिर्न सकिने भएको छ।

असार २२ गतेदेखि दिइएको यो सुविधा असार मसान्तसम्म लागु हुने कम्पनीले जनाएको छ। यो अवधिमा इसेवाका कुनै पनि सदस्य बैंक तथा वित्तीय संस्थाको किस्ता तिर्दा अथवा रकम पठाउँदा कुनै पनि किसिमको शुल्क लाग्ने छैन।

डिजिटल कारोबारलाई प्रोत्साहन गर्ने तथा कोभिड महामारीका बेला सहजै ऋणको किस्ता तिर्न सकियोस् भन्ने उद्देश्यले यो सुविधा दिइएको इसेवाका प्रमुख कार्यकारी अधिकृत सुभास सापकोटाले बताए।

उनले भने ‘इसेवाले जहिले पनि प्रयोगकर्ताहरूको हितमा काम गरिरहेको हुन्छ। अहिले कोभिड महामारीको अवस्था छ। अहिले असार मसान्त भएको हुनाले  बैंकको किस्ता तिर्नुपर्ने पनि हुन सक्छ। अर्कोतर्फ डिजिटल कारोबारलाई प्रोत्साहन गर्नुपर्ने अवस्था छ। यस्तो अवस्थामा थोरै भए पनि लाभ होस् भन्ने उद्देश्यले हामीले निःशुल्क किस्ता तिर्न सकिने सुविधा दिएका हौं।’

मोबाइल तथा इन्टरनेटको माध्यमबाट भुक्तानी गर्न सकिने सेवा दिएको इसेवामा हाल प्रत्यक्ष रूपमा खाता खोल्नेको संख्या करिब ४५ लाख रहेको कम्पनीले जनाएको छ। यसैगरी अप्रत्यक्ष रूपमा करिब एक करोड ६० लाख जनसंख्याले इसेवामार्फत सेवा लिइरहेका छन्।

हाल इसेवाका देशभर करिब एक लाख १० हजार  भन्दा बढी एजेन्ट (इसेवा जोन तथा पोइन्ट) रहेका छन् भने मर्चेन्टको संख्या तीन लाख नाघिसकेको कम्पनीले जानकारी दिएको छ।

इसेवाबाट इन्स्योरेन्सको प्रिमियम भुक्तानी, सेयर कारोबारको भुक्तानी गर्न सकिनुका साथै मोबाइल, टेलिफोन, इन्टरनेट, बिजुली तथा खानेपानीको महसुल भुक्तानी, रिचार्ज, हवाई जहाज, बसको टिकट, स्कुल कलेजको लगायतका शुल्क भुक्तानी गर्न मिल्छ।

इसेवामा हाल ५० वटा बैंक तथा वित्तीय संस्था सदस्य रहेका छन्। यी बैंकबाट इसेवामा सहजै रकम जम्मा गर्न तथा इसेवाबाट बैंक खातामा रकम पठाउन सकिने कम्पनीले जनाएको छ।