दक्षिण अमेरिकी मुलुक पेरुको चर्चित पर्यटकीय स्थल माचु पिच्चु विश्वका सात आश्चर्यमध्ये एउटा हो । माचु पिच्चु क्षेत्र इंका सभ्यताको निशानी पनि हो ।

कोरोना भाइरस महामारीको फैलावटलाई रोकनका लागि पेरुमा लगाइएको लकडाउनका कारण माचु पिच्चुपनि बन्द छ । तर हालै उक्त सातौँ आश्चर्य केवल एकजना पर्यटकका लागि मात्र खुल्ला गरिएको छ ।

समाचार अनुसार पेरुमा लकडाउनका कारण ३ महिनादेखि अड्किरहेका एकजना जापानी पर्यटकका लागि माचु पिच्चु खुल्ला गरिएको हो ।

ती जापानी पर्यटक माचु पिच्चु घुम्नकै लागि भनी ३ महिनाअघि तिनदिने भ्रमणका लागि पेरु पुगेका थिए । तर उनी पेरुमा पुगेकै बेला त्यहाँ लकडाउन भयो । जसका कारण न त उनी माचु पिच्चु नै पुग्न सके, न त जापान नै फर्किन पाए ।

हालै स्थानीय एक मिडियामा अन्तरवार्ता दिने क्रममा उनले आफु माचु पिच्चु घुम्नका लागि आएको तर ३ महिनादेखि फसिरहेको खुलासा गरेसँगै त्यसले पेरु सरकारकै ध्यान खिच्यो । त्यसपछि स्थानीय प्रशासनले ती जापानी पर्यटकलाई लकडाउनकै बीच माचु पिच्चु भ्रमण गर्ने प्रबन्ध गरेको हो । बन्द रहँदै आएको माचु पिच्चु केवल उनै जापानी पर्यटकका लागि मात्र खुल्ला गरियो ।

माचु पिच्चुलाई प्रायः मानिसहरु इंकाहरुको हराएको सहर पनि भन्दछन् । यो भग्नावशेष सहर इंका साम्राज्यको सबैभन्दा चर्चित प्रतीकमध्ये एक हो । त्यसलाई पेरुको एक ऐतिहासिक देवालय पनि भनिन्छ र त्यसलाई पवित्र स्थल मानिन्छ । सन् १९८३ मा माचु पिच्चुलाई युनेस्कोले विश्व सम्पदा सूचिमा सूचिकृत गरेको थियो ।

माचु पिच्चुमा घुम्नका लागि वर्षेनी लाखौँ पर्यटकहरु पुग्ने गर्दछन् । सन् १९११ मा अमेरिकी इतिहासकार हीरम बिंघमले पहिलोपटक माचु पिच्चुको खोज गरी विश्वसामु त्यसको इतिहास सार्वजनिक गरेका थिए ।

इतिहास अनुसार सन् १४५० मा इंका साम्राज्यका शासकहरुले उक्त सहरको निर्माण गरेका थिए । त्यसको एक सय वर्षपछि नै स्पेनिसहरुले इंकालाई पराजित गरेर राज्य कब्जा गरेसँगै त्यो सहरका बासिन्दा सबै भागे र सहर समयक्रमसँगै खण्डहरमा परिणत भयो ।

यो सहरका बारेमा अर्को एउटा रोचक किम्वदन्ती पनि छ । कतिपय मानिसहरुका अनुसार त्यो सहर मानिसले होइन एलियन्सले बनाएको हो । तर त्यसको कुनै पुष्टि हुन सकेको छैन ।

माचु पिच्चू सहरको निर्माण किन गरिएको थियो, त्यो अहिलेसम्म पनि रहस्यको रुपमा रहेको छ । कतिपयले चाहीँ उक्त सहर मानिसको बली दिनका लागि तयार गरिएको र बली पछि त्यहीँ नै गाड्ने गरिन्थ्यो । उत्खननका क्रममा त्यहाँ कैयन् मानव कंकालहरु समेत फेला परेको छन् । अझ अनौठो त के भने त्यस्ता कंकालमध्ये धेरै महिलाका रहेका छन् ।

कतिपय इतिहासकारका अनुसार इंकाहरुले सूर्यलाई आफ्नो भगवान ठान्दथे । त्यसैले सूर्यलाई खुसी पार्न भन्दै उनीहरुले कुमारी चेलीको बली दिन्थे । -एजेन्सी