एनआईसी एशिया बैंक लिमिटेडले चालू आर्थिक वर्षको दोस्रो त्रैमासमा ५७ करोड १७ लाख रुपैयाँ खुद मुनाफा आर्जन गरेको छ । बैंकको नाफा गत आर्थिक वर्षको सोही अवधिको तुलनामा २० दशमलव ७४ प्रतिशतले घटेको हो । गत आर्थिक वर्षको दोस्रो त्रैमासमा बैंकले ७२ करोड १४ लाख रुपैयाँ खुद मुनाफा आर्जन गरेकोे थियो ।

आठ अर्ब तीन करोड रुपैयाँ चुक्तापुँजी भएको बैंकले जगेडाकोषमा दुई अर्ब ६५ करोड ५७ लाख रुपैयाँ राखेको छ । निक्षेपमा ५२.३५ प्रतिशतले वृद्धि गरी एक खर्ब २० अर्ब ४६ करोड ६६ लाख ३२ हजार रुपैयाँ संकलन गरेको बैंकले कर्जामा ५१ प्रतिशतले वृद्धि गरी एक खर्ब दुई अर्ब २० करोड सात लाख ४५ हजार रुपैयाँ लगानी गरेको छ ।

बैंकको खुद व्याज आम्दानी ४२ दशमलव ५७ प्रतिशतले बढेर एक अर्ब ६४ करोड ५० लाख रुपैयाँ पुगेको छ भने सञ्चालन मुनाफा ०.०४ प्रतिशतले घटेर ७६ करोड ३४ लाख ७३ हजार रुपैयाँ पुगेको छ । यो अवधिमा १० करोड २६ लाख रुपैयाँ खराब कर्जा उठाएको बैंकले प्रोभिजनमा ३० करोड ११ लाख ११ हजार रुपैयाँ राखेको छ ।

पुस मसान्तमा एनआईसी एशिया बैंकको निष्कृय कर्जा शून्य दशमलव २६ प्रतिशत र जोखिमयुक्त सम्पति १३ दशमलव ५९ प्रतिशत रहेको छ । त्यस्तै, बैंकको प्रतिसेयर आम्दानी १४ दशमलव २४ रुपैयाँ, मुल्य आम्दानीे अनुपात २४ दशमलव २३ गुणा, प्रतिसेयर नेटवर्थ एक सय ३३ दशमलव ०७ रुपैयाँ र तरलता अनुपात २० दशमलव ३५ प्रतिशत रहेको छ ।