चितवन, कार्तिक १५-

स्वस्तिक नेपाल नामक सामाजिक गैरसरकारी संस्थाले प्रकाशन गरेको स्मारिका विमोचन एवं मानव सेवा आश्रम भरतपुरमा आश्रितहरुलाई भोजन कार्यक्रम सम्पन्न भएको छ ।

भरतपुर वाईपासरोडमा रहेको आश्रममा आज एक कार्यक्रमको आयोजना गरी संस्थाले आश्रमको संस्थागत आजिवन सदस्यता पनि लिएको छ । कार्यक्रममा आाफ्नो पहिलो पटक प्रकाशनमा आएको स्मारिकाको विज्ञापनबाट संकलित रकमबाट २५ हजार सहयोग शुल्क तिरेर आजिवन सदस्यता लिएको संस्थाले जनाएको छ । सदस्यता लिंदै आश्रममा आश्रित असहायहरुलाई भोजन सेवा समेत गराईएको थियो । सो क्रममा स्वास्तिक नेपालको स्मारिका समेत विमोचन गरिएको थियो ।

संस्थाका अध्यक्ष बालकृष्ण कँडेलको अध्यक्षतामा भएको कार्यक्रममा बोल्दै चितवनका प्रहरी उपरीक्षक दीपक थापाले आश्रममा आएर कार्यक्रम गरी सेवा गरेको भन्दै संस्थाको प्रशंसा गर्नुभयो । अध्यक्ष कँडेलले विगतमा पनि आश्रमका असहायहरुलाई सहयोग गर्दै आएको र आगामी दिनमा पनि सहयोग जारी राख्ने प्रतिबद्धता जनाउनुभयो । शिक्षा, स्वास्थ्य र विभिन्न प्राशिक्षण कार्यक्रममा सक्रिय रहँदै आएको गैरसरकारी संस्था स्वस्तिक नेपालले यसअघि गएको फागुनमा पनि यहाँ खाद्यान्न उपलव्ध गराएको थियो ।

कार्यक्रममा संस्थाका संस्थापक अध्यक्ष हिरामान महर्जन, पूर्व अध्यक्षहरु गणेश प्रसाद पौडेल, महेन्द्र बहादुर कार्की, आश्रमका अध्यक्ष रामजी अधिकारीलगायतको उपस्थिीती रहेको थियो । स्वस्तिक नेपालको स्मारिक प्रकाशनबाट आएको केही रकम आश्रमलाई सहयोग गरिएको र केही रकम अन्य विपन्न क्षेत्रमा पनि सहयोग गर्ने योजना रहेको कार्यक्रम संयोजक अर्जुन अधिकारीले जानकारी दिनुभयो ।