चितवन, भदौं २५–

पूर्वी चितवनको कालिका नगरपालिका–७ सगुनटोलस्थित भिक्टोरियस युथ क्लवको छैठौ वार्षिक उत्सवको अवसरमा आजबाट भिक्टोरियस कप फुटबल–२०७४ शुरु भएको छ ।

‘विकासका लागि युवा’ भन्ने मुल नाराका साथ आयोजना गरिएको सो फुटबल प्रतियोगिताको कालिका नगरपालिकाका नगर प्रमुख खुमनारायण श्रेष्ठले फुटबल हस्तान्तरण गरि प्रतियोगिताको उद्घाटन गरेका थिए । क्लबका अध्यक्ष दिवश सिंजाली मगरको अध्यक्षतामा सो कार्यक्रम भएको थियो ।

प्रतियोगिताको आजको खेल आयोजक भिक्टोरियस युथ क्लव र सुनौलो तारा युवा क्लव, भोकाहा, रत्ननगर बिच भएको थियो । प्रतियोगितामा २६ वटा समूहले भाग लिएका छन् । प्रतियोगिताको फाइनल खेल असोज १० गते हुनेछ । प्रतियोगितामा प्रथम हुने समूहले १५ हजार ५ सय ५ रुपैयाँ र द्वितीय हुने समूहले ७ हजार ५ सय ५ रुपैयाँ तथा शिल्ड र प्रमाणपत्र प्राप्त गर्नेछन् । त्यस्तै उत्कृष्ट गोलकिपर, उत्कृष्ट टिम, उत्कृष्ट खेलाडी र सर्वाधिक गोलकर्ता खेलाडीलाई समेत पुरस्कृत गरिने आयोजकले जनाएको छ ।

सो कार्यक्रममा कालिका वडा नं. १ का वडाध्यक्ष लिला बहादुर गुरुङ्ग, वडा नंं. ३ का वडाध्यक्ष टिकाराज रिजाल, वडा नं. ७ का वडाध्यक्ष डिल्लीप्रसाद दवाडी, उदयपुर सामुदायिक वनका अध्यक्ष केशव लामा, इलाका प्रहरी कार्यालय टाँडीका प्रमुख बासुदेव खतिवडा लगायतको उपस्थित रहेको थियो ।