नवलपरासी,भदौ २४ –

नवलपरासी गैँडाकोट नगरपालिका वडा नं १२ र १४ को सिमानास्थित टाउन खोलामा पक्की पुल निर्माण हुने भएकोे छ ।

पुल निर्माणका लागि गैँडाकोट नगरपालिकाले रु ९० लाख बजेट विनियोजन गरिएको छ । पुल निर्माणको काम शुरु भएको र यही आर्थिक वर्षमा पुल बन्ने गैँडाकोट–१२ का वडाध्यक्ष थिरबहादुर थनेतले बताउनुभयो ।

पुल नबन्दा गैँडाकोट–१२ का स्थानीयले धेरै सास्ती बेहोर्दै आइरहेका छन् । जोखिम मोलेर भएपनि बिद्यार्थीले विद्यालय जान खोला तर्नुपर्ने अवस्था रहेको गैँडाकोट–१४ का तिलबहादुर विकले बताउनुभयो । घरबाट बाहिर जाँदा खोला बढेको हुँदैन, घर फर्कदा खोला बढेर तर्न नसकेका धेरै घटना भएको विकले बताउनुभयो ।

पुलको अभावमा समयमा नियमित विद्यालय जान बिद्यार्थीलाई समस्या हुने गरेकाले पढाइसमेत बिग्रने गरेको अभिभावक सोमबहादुर विकले बताउनुभयो ।

खोलामा पुल नहुँदा विद्यार्थीलाई मात्र होइन, स्थानीयस्तरमा हुने व्यापार व्यवसाय र खरिदबिक्रीमा समेत समस्या आउने गरेकोे स्थानीय सावित्री हमालले बताउनुभयो । – रासस