चितवन, भदौं २३–

नेकपा माओवादी (केन्द्र)का अध्यक्ष पुष्पकमल दाहाल ‘प्रचण्ड’ले आगामी निर्वाचनमा चितवनबाट चुनाव लड्ने घोषणा गर्नुभएको छ ।

प्रेस सेन्टर चितवनले आज गरेको पत्रकार सम्मेलनमा बोल्दै अध्यक्ष प्रचण्डले गृहजिल्ला चितवनबाट चुनाव लड्ने घोषणा गर्नुभएको हो । “मैले देशभरको चुनावी अनुभव बटुलेको छु, अब आफ्नै जिल्लाबाट चुनाव लड्ने घोषणा गर्दछु”–अध्यक्ष प्रचण्डले भन्नुभयो । अध्यक्ष प्रचण्डले चितवनको भुमिकालाई राष्ट्रिय राजनीतिको अग्रस्थानमा पु¥याउन पनि आफू चितवन आउन लागेको बताउनुभयो । “भौगोलिक रुपमा केन्द्र बनेको चितवनलाई अब राजनीतिक भुमिकालाई अग्रस्थानमा लैजान म आउन लागेको हुँ, यसले राष्ट्रिय राजनीतिलाई नै नयाँ मोड दिन सक्छ”–अध्यक्ष प्रचण्डले भन्नुभयो ।

उहाँले थप्नुभयो– “शान्ति प्रक्रियामा आएपछि पहिले रोल्पा, काठमाडौं र मधेसबाट चुनाव लडेँ। त्यहाँका जनताले मलाई मतदान गरेर विजयी पनि गराए। उनीहरूकै मतले गणतन्त्र नेपालको पहिलो प्रधानमन्त्री बन्ने अवसर मिल्यो,अब देशलाई आर्थिक समृद्धि तिर लैजानु छ । त्यसको नेतृत्व अब चितवनबाट हुन्छ।”

अध्यक्ष प्रचण्डले चितवनको जुनसुकै क्षेत्रबाट चुनाव लड्न सक्ने भन्दै यहाँका जनताले आफ्नो भुमिका र पार्टीको योगदान बुझ्नेमा विश्वास व्यक्त गर्नुभयो । अध्यक्ष प्रचण्डले आफूले कुन क्षेत्रबाट लड्ने भन्ने बारे नखुलाए पनि क्षेत्र नं.३ बाट लड्ने तयारी रहेको बताइएको छ ।

अध्यक्ष प्रचण्डले अब देशमा तिव्र गतिमा आर्थिक विकास हुनु जरुरी रहेको भन्दै यसको नेतृत्व नै माओवादीले गर्ने बताउनुभयो । उहाँले यसैका लागि आफ्नै गृहजिल्ला आएको बताउनुभयो ।

चितवनलाई विकास गर्ने प्रचण्डको योजना

माओवादी अध्यक्ष प्रचण्डले चितवनको विकासमा कायापलट ल्याउने उद्घोष गर्नुभएको छ । संभावनाले भरिएको चितवनलाई विकास गर्नका लागि नै आफू चितवन आएको प्रचण्डको भनाई छ । अध्यक्ष प्रचण्डले चितवन शैक्षिक, स्वास्थ्य, कृषि, आद्योगिक सबै हिसाबले उपयुक्त रहेकोले दिर्घकालिन रुपले कार्ययोजना ल्याएर चितवनको विकास गर्ने बताउनुभयो । उहाँले चितवन सबै हिसाबले पूर्वाधारयुक्त र संभावना भएको ठाउँ भएकोले जिल्लालाई नै महानगर बनाउनु पर्ने बताउनुभयो ।

यस्तै अध्यक्ष प्रचण्डले चितवनको नारायणी नदी र राप्ती नदीलाई जोडेर रिङ रोड बनाउन सकिने भन्दै यसको थालनी भरतपुर महानगरपालिकाले गर्ने बताउनुभयो । उहाँले पश्चिम चितवनबाट नवलपुर जोड्न दुई वटा पुल निर्माणको आवश्यकता रहेको भन्दै यसको लागि आफू लागिपरिरहेको बताउनुभयो ।

मधेसमा माओवादीप्रति जनलहर बढ्यो

अध्यक्ष प्रचण्डले प्रदेश नंं २ को स्थानीय तहको निर्वाचनमा मधेसी जनताले माओवादीलाई भोट हाल्ने दावी गर्नुभयो ।

पछिल्लो आफ्नो दश महिने सरकारले गरेको क्रियाकला र क्षेत्रीय पार्टीबाट नभई राष्ट्रिय पार्टीबाट मात्रै हकअधिकार स्थापित हुने कुरा मधेसी जनताले बुझेको भन्दै माओवादीप्रति मधेसी जनता आकर्षति भएको बताउनुभयो । उहाँले भन्नुभयो–“म मधेसी जनता बसेको कोर क्षेत्रमा गए, सबै हामीप्रति आकर्षित छन्, हामीले मात्रै मधेसी जनताको हक, अधिकार र विकास गर्न सक्छौं भन्ने कुरा उहाँहरुले बुझ्नुभएको छ ।”

उहाँले प्रदेश नं.२ मा काँग्रेससंग धेरै क्षेत्रमा तालमेल गर्ने प्रयत्न भएपनि काँग्रेसको आन्तरिक कलहले नै त्यो सम्भव नभएको बताउनुभयो । उहाँले प्रदेश र संघीय निर्वाचनमा भने काँग्रेससंगै तालमेल हुने स्पष्ट पार्नुभयो ।

चितवनमा मिडिया एकेडेमी निर्माणमा सहयोग गर्ने

अध्यक्ष प्रचण्डले चितवनमा मिडिया एकेडेमी निर्माण गर्न पहल गर्ने प्रतिवद्धता जनाउनुभएको छ । नेपाल पत्रकार महासंघ चितवन शाखाका उपाध्यक्ष नारायणप्रसाद अधिकारीले राखेको जिज्ञासाको समाधान गर्दै अध्यक्ष प्रचण्डले सो प्रतिवद्धता जनाउनुभएको हो । “मैले पहिलेदेखि भन्दै आएको छु चितवनका पत्रकारहरुका लागि मैले संस्थागत सहयोग गर्छु”–अध्यक्ष प्रचण्डले भन्नुभयो ।