रुकुम,भदौं २०-

स्थानीय तहको निर्वाचन हुनुपूर्व सरकारले रुकुमलाई टुक्राएपछि आक्रोशित भएका रुकुमवासीहरुले अहिले भने खुसी भएका छन् । भदौ ५ गते बसेको मन्त्रिपरिषदको बैठकले नेपालमा ७७ जिल्ला बनाउने निर्णय गरेसँगै पूर्वी रुकुमबासीहरु खुशी भएका हुन् ।

पूर्वी रुकुमको सिस्ने गाउँपालिकाको रुकुमकोटमा रहेको पुरानो रुकुमको सदरमुकाम २०३० सालमा मुसिकोट नगरपालिकामा सारेपछि आफुहरु अन्यायमा परेको भन्दै आक्रोशित बनेका थिए । अहिले सरकारले आफुहरुको मागको सम्बोधन गरिदिएको भन्दै सरकारप्रति आभार व्यक्त गरिरहेका छन् ।

पूर्वी रुकुम टुक्र्याएको भन्दै संविधान घोषणा हुँदा स्थानीयवासीले ११ दिनसम्म जिल्ला बन्द गराएका थिए । तर पनि पश्चिम रुकुमलाई ६ नम्बर प्रदेशमा र पूर्वी रुकुमलाई ५ नम्बर प्रदेशको अनुसूचीमा राखेर संविधान जारी भएको थियो । संविधान जारी भएपछि छुट्टै जिल्ला बनाउन माग गर्दै आएका स्थानीयवासी अहिले सरकारले आफुहरुको मागको सम्बोधन गरिदिएकोमा खुसी भएको भुमे गाउँपालिका अध्यक्ष रामसुर बुढा बताउनु हुन्छ ।

सरकारले नयाँ जिल्लाको रुपमा पूर्वी रुकुमलाई घोषणा गरेर न्याय गरेको र अब जतिसक्दो छिटो त्यहाँ कर्मचारी व्यवस्थापन र प्रशासनिक कामको सुरुवात गर्नुपर्ने स्थानीयवासीको माग छ ।