चितवन, असोज ३१–

पहिलो सिएमसी मेयर कप–२०७४ अन्तर वडा क्रिकेट प्रतियोगिताको उपाधि भरतपुर महानगरपालिका वडा नम्बर १० को ‘बी’ टिमले जितेको छ । भरतपुर–१० स्थित वीरेन्द्र क्याम्पसको नौ विघा खेल मैदानमा सोमबार सम्पन्न फाइनल खेलमा वडा नम्बर २५ लाई ६ विकेटले पराजित गर्दै १० ‘बी’ ले उपाधि जितेको हो ।

उपाधिसँगै १० ‘बी’ले ट्रफी र ५० हजार नगद पुरस्कार पाएको छ भने उपविजेता वडा नम्बर २५ ले ट्रफी र २५ हजार नगद पुरस्कार प्राप्त गरेको छ । विजेता र उपविजेतालाई भरतपुर महानगरपालिकाका मेयर रेणु दाहाल र उपमेयर पार्वती शाहले पुरस्कार प्रदान गरे ।

टस जिते पहिले व्याटिङ गरेको भरतपुर २५ ले निर्धारित २० ओभरको खेलमा १९.३ ओभर खेल्दा ९३ रनमात्र बनाएर अलआउट भयो । जवाफमा भरतपुर १० बीले १३.१ ओभर मात्रै खेलेर जम्मा ४ विकेट गुमाएर लक्ष्य पूरा ग¥यो । विजेता टिमका लागि क्याप्टेन राजन श्रेष्ठले १९ रन र ३ विकेटसहित अलराउण्ड प्रदर्शन गरे । प्रतियोगिता अवधिभर उत्कृष्ट प्रदर्शन गरेका राजन म्यान अफ दी सिरिज घोषित भए । त्यस्तै एकै खेलमा १ सय ३७ रन हानेका भरतपुर–४ का राजिव विक बेस्ट ब्याट्सम्यान बने । त्यस्तै भरतपुर १० बीका सागर लामा बेस्ट बलर घोषित भए । राजन, राजिव र सागर तीनै जनाले ट्रफीका साथ समान २ हजार पुरस्कार पाए ।

गत असोज १ गते सुरु भएको प्रतियोगिता करिब १ महिनापछि सोमबार सकिएको हो । भरतपुर क्रिकेट क्लबको आयोजनामा गरिएको प्रतियोगितामा चितवन मेडिकल कलेज (सिएमसी) ले मुख्य प्रायोजन गरेको थियो । प्रतियोगितामा १९ वटा टिम सहभागी थिए ।

समापन कार्यक्रममा सम्बोधन गर्दै प्रमुख अतिथि भरतपुरका मेयर रेणु दाहालले खेलकुद विकासका लागि भरतपुर महानगरपालिका गम्भीर रहेको बताइन् । युवा सक्रियतामा सघाउने खेलकुदका लागि जस्तोसुकै सहयोग गर्नपनि आफू तयार रहेको उनले बताइन् । उपमेयर पार्वती शाहले पनि प्रतियोगिताले युवालाई व्यस्त बनाएर चौतर्फी विकासमा लगाउन खेलले सहयोग गर्ने बताइन् । चितवन मेडिकल कलेजका सहायक प्राध्यापक ममता शर्मा न्यौपानेले सिएमसी जहिल्यैपनि खेलकुद विकासका लागि लगानी गर्न इच्छुक रहेको बताइन् ।

भरतपुर क्रिकेट क्लबका अध्यक्ष अनिल अधिकारीले प्रतियोगिता गर्न निकै दुःख हुने गरेको बताए । लामो समयपछि स्थानीय तह निर्वाचन भएको खुसियालीमा मेयरलाई जोडेर प्रतियोगिता गर्दा पनि धेरैखाले समस्या आइपरेको स्मरण गर्दै उनले प्रतियोगिता भव्य भएकोमा गर्व गरे । क्लबका सल्लाहकार मित्रनिधि तिवारीले आगामी दिनमा भरतपुर महानगरसँगै सबै क्षेत्रले खेलकुद क्षेत्रमा सहयोग गरेको हेर्न चाहेको बताए ।