केन्द्रिय तथ्यांक विभागले राष्ट्रिय जनगणना २०७८ सम्पन्न भएको जनाएको छ । विभागले शुक्रबार एक कार्यक्रमको आयोजना गर्दै राष्ट्रिय जनगणना २०७८ सम्पन्न भएको जनाएको हो ।

विभागका अनुसार घर तथा घर परिवार सूचीकरण कार्यमा ६८ लाख परिवारको गणना भएको अवस्था छ । जुन २०६८ सालको जनगणनाा अनुसार प्रक्षेपण गरिएको करिब नजिक रहेको छ । अनुमानित जनसंख्याका केही तलमाथी भए पनि अनुमानित जनसंख्या करिब ३ करोड पुग्ने अनुमान गर्न सकिन्छ ।

विभागले जनगणना २०७८ को पूर्ण विवरण आउँदा नेपालको जनसङ्ख्या दुई करोड ८५ लाखदेखि तीन करोडको हाराहारीमा पुग्ने अनुमान गरिएको जनाएको छ । विभागका अनुसार जनगणनाबाट सोधिएका प्रश्नको पूर्ण विवरण आउन एक वर्ष लाग्नेछ । गणकले सोधिएका प्रश्नको तथ्याङ्क कम्प्युटरमा अपलोड गर्न ६ देखि ९ महिना लाग्ने र त्यसको तीन महिनामा पूर्ण विवरण आउने गरी विभागले काम अगाडि बढाउनेछ ।

विभागका अनुसार नेपालको कुल जनसङ्ख्या, महिला र पुरुषको कुल सङ्ख्या भने दुईदेखि तीन महिनामा आइसक्नेछ । केही दिनभित्रमै गणकले भरेको फारामलाई जिल्ला र प्रदेश जनगणना कार्यालयमा ल्याउने र त्यहाँबाट फाराम केन्द्रीय तथ्याङ्क विभाग ल्याउने प्रक्रिया अगाडि बढ्ने विभागले जनाएको छ ।