एनआइसी एसिया बैंकले बचतको ब्याज दर ०.५ प्रतिशत बिन्दुले घटाएको छ। बैंकले बिहीबार वेबसाइटमार्फत नयाँ ब्याज दर सार्वजनिक गरेको छ।

बैंकले बचतमा अधिकतम ५.५ र न्यूनतम ३.५ प्रतिशत ब्याज दिँदै आएको थियो। यसमा बैंकले ०.५ प्रतिशतले कटौती गरेर बढीमा ५ र न्यूनतम ३ प्रतिशत ब्याज दर कायम गरेको हो।

बैंकले ०.५ प्रतिशत बिन्दुले ब्याज घटाउँदा ब्याज खर्च ४२ करोड २१ लाख रुपैयाँभन्दा बढी कम हुने छ।

बचतको ब्याज घटाउँदा त्योसँग जोडिएको कल डिपोजिटको ब्याज पनि घट्छ। राष्ट्र बैंकले बचतको न्यूनतम ब्याजभन्दा बढी कल डिपोजिटमा दिन पाइँदैन। यसो हुँदा कल डिपोजिटको अधिकतम ब्याज दर साढे तीन प्रतिशतबाट तीन प्रतिशतमा कायम भएको छ।

बैंकसँग बचत खातामा ६७ अर्ब ५० करोड र कलमा १६ अर्ब ९३ करोड रुपैयाँ निक्षेप छ। यो बैशाखसम्मको स्वदेशी मुद्राको निक्षेप हो।

एनआइसी सर्वाधिक बचत खाता (प्रडक्ट) भएको बैंक हो। बैंकसँग कुल ९४ प्रकारका बचत खाता छन्। यसमध्ये ७८ प्रकारका खाताको ब्याज दर ३ प्रतिशत छ भने १६ प्रकारका खाताको ब्याज दर ५ प्रतिशत छ।

नेपाल राष्ट्र बैंकले सबै बैंकहरुलाई निर्देशन दिँदै ऋणीको ब्याज दर २ प्रतिशत बिन्दुले कटौती गर्न भनेको थियो। त्यसपछि बैंकहरुले निक्षेपको ब्याज घटाउन पहल गरेका थिए। बैंकहरूको तयारी बारे थाहा पाएपछि राष्ट्र बैंकले असार मसान्तसम्म निक्षेपको ब्याज नघटाउन मौखिक निर्देशन दिएको थियो ।