बैंक तथा वित्तीय संस्थामा रहेको खाताको सूचना विदेशमा जाने क्रम रोकिने भएको छ । नेपाल राष्ट्र बैंकले गत वर्षको मौद्रिक नीतिमा नै विदेशी कार्डहरुको भुक्तानी राफसाफ नेपालमा नै गर्न निर्देशन दिए, बमोजिम हाल विदेशी कार्डहरु मास्टर, भिसा र युनियन पेको राफसाफ नेपालमा नै हुने भएपछि बैंकका ग्राहकको खाताको सूचना बाहिर नजाने भएको हो ।

यसभन्दा पहिला भिसा कार्डबाट कुनै पनि कारोबार गरिएका त्यसको राफसाफ भारतको पुणेबाट हुने गरेको थियो भने मास्टर कार्डको राफसाफ सिंगापुरबाट हुने गरेको थियो ।

त्यस्तै युनियन पेको राफसाफ चीनबाट हुने गरेको थियो । अब डलर र भारु खातावालाको बाहेक यी सबैको राफसाफ नेपाली रुपैयाँमा नै हुने भएको छ । अन्तर्राष्ट्रिय कार्डको रकमको व्यवस्थापन चालू आर्थिक वर्षको अन्त्यसम्ममा नेपाली रुपैयाँमा नै गर्नुपर्ने राष्ट्र बैंकले निर्देशन दिएको थियो ।

नेपालमा धेरैभन्दा धेरै प्रचलनमा रहेका मास्टर कार्ड र भिसा कार्ड हुन् । हिमालयन बैंक, नबिल बैंक, नेपाल इन्भेष्टमेन्ट बैंक, स्ट्यान्डर्ड चार्टर्ड बैंक नेपाललगायतका बैंकहरु नेपालमा चलनचल्तीमा आएका कार्डको स्थानीय एजेन्ट बन्न लागिपरेका थिए ।

अन्त्यमा भिसाको स्थानीय राफसाफ प्रतिनिधि नेपाल इन्भेष्टमेन्ट बैंकले पाएको छ भने मास्टर कार्डको स्ट्यान्डर्ड चार्टर्ड बैंक नेपालले पाएको छ । त्यस्तै चिनियाँ कार्डको भने हिमालयन बैंकले पाएको छ । नेपाल इन्भेष्टमेन्ट बैंक कार्ड शाखाकी जनसम्पर्क अधिकृत सिर्जना मानन्धरले भिसाको लागि स्थानीय सेटलमेन्ट एजेन्ट अब एनआइबीएल रहेको जानकारी दिइन । त्यस्तै युनियन पेको नेपालको स्थानीय राफसाफ प्रतिनिधि हिमालयन बैंक रहेको बैंकका कार्ड विभागका प्रमुख भाष्कर दाहालले आर्थिक न्युजडटकमलाई बताएका छन् ।

योभन्दा पहिले नेपाली बैंकमा खाता रहेका खातावालाको खाताको सम्पूर्ण सूचना विदेशीसमक्ष पुगिरहेको थियो भने प्रत्येक महिना करिब १ अर्ब ५० लाख रुपैयाँ कमिसनसमेत उनीहरुले लिँदै आएका थिए । हाल भिसा, मास्टर र युनियन पे कार्ड गरी नेपालमा हजारौं कार्ड जारी भएका छन् । यी कार्डको स्थानीय राफसाफ प्रतिनिधि भएपछि अब कार्ड प्रयोगकर्ताहरुले कुनै पनि कमिसन तिर्न नपर्ने भएको एनआइबीएल कार्ड विभागकी जनसम्पर्क अधिकृत सिर्जना मानन्धरले बताइन ।