चितवन, कार्तिक २३–

प्रदेश सभा तर्फको चितवन क्षेत्र नं.३ (ख)का लोकतान्त्रिक गठबन्धनका उम्मेद्वार साजन कुमार महतोले विकास निर्माणका लागि लोकतान्त्रिक गठबन्धन एक भएर अघि बढेको बताउनुभएको छ ।

आज निर्वाचन क्षेत्र अन्तरगत पर्ने विभिन्न क्षेत्रहरुमा आयोजित कार्यक्रमहरुलाई सम्बोधन गर्दै उम्मेद्वार महतोले अबको आवश्यकता नै विकास भएको भन्दै देशलाई समृद्धि तर्फ लैजान लोकतान्त्रिक गठबन्धनको ध्यान केन्द्रित भएको बताउनुभयो । उहाँले विभिन्न कालखण्डमा वामगठबन्धनमा आवद्ध दलहरुले नै देशलाई विनाश तर्फ लगेको भन्दै अब नेपाली काँग्रेससंगै आवद्ध दलहरु विकासलाई पहिलो प्राथमिकतामा राखेर अघि बढेको बताउनुभयो ।

अहिले दुई गठबन्धनको ठूलो संघर्ष चलिरहेको भन्दै वामगठबन्धनलाई पराजित गरि देशलाई समृद्धिको बाटोमा लैजानुपर्ने धारणा राख्नुभयो । उहाँले हिंसाबाट अब शान्तिको बाटोमा देश आईसकेको भन्दै यसलाई कायम गर्न लोकतान्त्रिक गठबन्धनको जित आवश्यक रहेको बताउनुभयो । सो क्रममा उहाँले आफू गाउँघरमै हुर्किएर गाउँघरकै सेवामा निरन्तरत लागि परेकोले आफ्नो जित सुनिश्चित भएको दावी गर्नुभयो ।

उम्मेद्वार महतो आज निर्वाचन लक्षित जगतपुर बजारमा आयोजित संयुक्त क्षेत्रीय कार्यालय उद्घाटन, शिवनगरमा संयुक्त वडा कार्यालय उद्घाटन, कृष्णचोकमा संयुक्त वडा कार्यालय उद्घाटन र चनौलीमा क्षेत्रीय कार्यालय उद्घाटन कार्यक्रममा सम्बोधन गर्नुभएको थियो । सो कार्यक्रमहरुमा लोकतान्त्रिक गठबन्धनबाट प्रतिनिधि सभाका उम्मेद्वार विक्रम पाण्डेले समेत सम्बोधन गर्नुभएको थियो ।