भक्तपुर, कार्तिक १६ –

दुई दिनको अवधिमा भक्तपुरका चार छुट्टाछट्टै स्थानमा एक जना विदेशीसहित चार जना व्यक्ति मृत अवस्थामा फेला परेका छन् ।
महानगरीय प्रहरी परिसर भक्तपुरले जनाए अनुसार नगरकोटस्थित होटल हिमालयन भिल्लामा बंगलादेशको नागरिक ३४ वर्षीय हसन फेरोदोस अचानक बेहोस भएको र उपचारको लागि डा. ईवामुरा अस्पताल लगिएकोमा डाक्टरले मृत्यु भइसकेको घोषणा गरेको हो ।

परिसरका प्रवक्ता कृष्ण प्रसाईका अनुसार सूर्यविनायक नगरपालिका ८ जगातीमा धादिङ बैरेनी ९ घर भई हाल भक्तपुर बस्ने २३ वर्षीय शम्भु खत्रीलाई महानगरीय प्रहरी वृत्त जगातीको मोवाइल टोलीले अचेत अवस्थामा फेला पारी भक्तपुर अस्पताल लगेकोमा डाक्टरले मृत्यु भइसकेको घोषण गरेको थियो ।

यसैगरी ओखलढुंगा घर भइ हाल सूर्यविनायक नगरपालिका ३ बालकोट बस्ने ३२ वर्षीया सरिता सार्की बेलुका खाना खाई आफ्नै कोठामा सुतिरहेको अवस्थामा मृत फेला परेको प्रवक्त प्रसाईले बताए।

यस्तैगरी सूर्यविनायक नगरपालिका ९ भातेढिकुरस्थित होटल भ्यूमा लेवर काम गर्ने र होटलको छाप्रोमा बस्ने उदयपुर त्रियुगा नगरपालिका १६ को ३० वर्षीय नवराज राई मृत अवस्थामा फेला परेको प्रहरीले जनाएको छ । प्रहरीका अनुसार यी सबै घटनाहरूबारे थप अनुसन्धान भइरहेको छ।