चितवन, कार्तिक १५-

चितवनमा पहिलो पटक ‘चौथो अन्तराष्ट्रिय क्यान्सर सम्मेलन’ हुने भएको छ । भोली (विहीबार)देखि कार्तिक १८ गतेसम्म भरतपुरस्थित वीपी कोइराला मेमोरियल क्यान्सर अस्पतालमा सम्मेलन हुन लागेको हो ।

सार्क फेडेरेशन अफ अंकोलोजिष्ट नेपालको आयोजनामा हुन लागेको सम्मेलनको औपचारिक समुद्घाटन भने कार्तिक १७ गते नायिका मनिषा कोइरालाले गर्ने आयोजक समितिका सचिव डा.उमेश नेपालले जानकारी दिए । क्यान्सरसंग लडेर नयाँ जीवन पाएकोले नायिका कोइरालालाई प्रमुख अतिथि बनाइएको आयोजकले जनाएको छ । उद्घाटन सत्र नारायणगढमा हुनेछ ।

आज भरतपुरमा पत्रकार सम्मेलन गरि आयोजक समितिले विशेषज्ञसहित ३ सय जनाको सहभागिता रहने जनाएको छ । सम्मेलनमा अमेरिका, टर्की, क्यानाडा, सिंगापुर, भारत, चीन, श्रीलंका, बंगलादेशका २० जना विशेषज्ञले अनुसन्धान्तामक खोजपत्रहरु प्रस्तुत गर्ने सचिव डा.नेपालले जानकारी दिए ।

यस सम्मेलनमा क्यान्सर क्षेत्रमा कार्यरत विशेषज्ञहरुको अनुभव, अध्ययन, अनुसन्धान साटासाट गरिनेछ । यसले नेपालमा कार्यरत क्यान्सर क्षेत्रका चिकित्सकहरुको क्षमता वृद्धिमा सहयोग पुग्ने आयोजक समितिका अध्यक्ष डा.भोला रौनियारले जानकारी दिए ।

नेपालमा हाल क्यान्सर क्षेत्रमा एक सय जनाको हाराहारीमा चिकित्सकहरु कार्यरत रहेका छन् । नेपालमा न्यून चिकित्सकले उपचार गर्नुपर्ने भएकाले यस सम्मेलन महत्वपूर्ण टेवा पुग्ने विश्वास गरिएको छ ।