चितवन, असोज २०–

नेकपा माओवादी (केन्द्र)का प्रभावशाली नेता रामबहादुर थापा ‘बादल’ आसन्न प्रतिनिधि सभाको निर्वाचनमा चितवन क्षेत्र नंं.२ बाट चुनाव लड्ने भएका छन् ।

प्रतिनिधि र प्रदेश सभाको उम्मेद्वारहरु धमाधम सिफारिस भईरहेको बेला माओवादी नेता बादल केन्द्रीय निर्णय अनुसार नै चितवन क्षेत्र नं.२ बाट चुनाव लड्न लागेका हुन् । २०६४ सालको संविधानसभा निर्वाचनमा चितवन क्षेत्र नं.२ बाट विजयी भएका बादल २०७० सालको निर्वाचन भने बहिष्कार गरेका थिए ।

यसपटक बाम गठवन्धन भएपछि नेता बादल निर्वाचन लड्न तयार भएका हुन् । स्रोतका अनुसार माओवादीबाट प्रदेश नं.३ को पहिलो प्राथमिकतामा पार्टी अध्यक्ष प्रचण्ड र नेता बादल पर्ने भएका कारण उनी चुनाव लड्ने निश्चित भएको हो । नेता बादल भरतपुर महानगरपालिका वडा नं.१० निवासी हुन् । चितवन क्षेत्र नं.२ बाट एमाले जिल्ला अध्यक्ष कृष्णभक्त पोखरेल सिफारिस भईसकेका छन् । बादल पनि यसै क्षेत्रबाट चुनाव लड्ने भएपछि यहाँको राजनीतिक माहोलमा झन तरंग थपिएको छ ।

प्रचण्ड र बादल चितवनबाट चुनाव लड्ने भएपछि चितवनको प्रदेश क्षेत्रका लागि भने माओवादीले उम्मेद्वार छनौट गरेको छैन् । पार्टीका शीर्ष नेता चितवनमा चुनाव लड्ने निश्चित भएपनि अन्तिम निर्णय भने बाम गठबन्धनको (६०/४०) को सहमती अनुसार हुने माओवादी (केन्द्र)का केन्द्रीय सचिवालय सदस्य सूर्यप्रकाश सुवेदी ‘पथिक’ले नारायणी अनलाईनलाई जानकारी दिए । उनले चितवनको क्षेत्र नं.१ मा एमालेका नेता सुरेन्द्र पाण्डे सिफारिस भईसकेकोले उनको स्थानमा माओवादीले कुनै दावी नगर्ने बताए ।

यस्तै पथिकले बाम एकताको स्वागत गर्दै जिल्लामा केन्द्रीय निर्णय अनुसार नै पार्टीले गतिविधि संचालन गर्ने जनाए ।