काठमाडौं,असोज ४-

जन्मदिनको अवसरमा हास्यकलाकार सीताराम कट्टेल धुर्मुस र उनकी धर्मपत्नी कुञ्जना घिमिरे सुन्तलीले चौँथो बस्ती शिलान्यास गरेका छन् । आफ्नो जन्मदिनमा रौतहट, चन्द्रपुर नगरपालिका– ८ सन्तपुरका ४५ घर दलित परिवारका लागि ४५ आवासीय घर बनाउन लागेको कट्टेलले जानकारी दिए ।

५ करोड ७५ लागत अनुमानित गरिएको बस्ती एकीकृत स्वरूपको हुने उनको भनाइ थियो । “बस्तीमा ४५ आवासीय घर, १ भ्यु टावर, १ सामूदायिक भवन, १ मन्दिर, सार्वजनिक धाराहरु र शौचालयहरू बन्नेछन् । र आज असोज ४ गतेबाट सुरू भई माघको २४ गते परियोजना हस्तान्तरण हुनेछ,” उनले प्रष्ट्याए ।

एकीकृत नमुना सन्तपुर बस्तीको शिलान्यास त्यहीँकी १०७ वर्षीय वयोवृद्ध रामकलिया देवी हजाराको हातबाट गरिएको उनको भनाइ थियो । फाउन्डेनले ५ अर्ब लागत अनुमान गरिएको विश्वले चिन्नेछ नेपाल परियोजनाअन्तर्गत नेपालभित्र नमुना नेपालको अवधारणा अघि बढाएको छ भने तीन एकीकृत नमुना बस्ती निर्माण गरिसकेको छ । भूकम्पपीडितका लागि एकीकृत पहरी बस्ती र गिरानचौर एकीकृत नमुना बस्ती निर्माण गरेका छ । त्यस्तै महोत्तरी बर्दिबासमा रहेका ५५ घरधूरी मुसहरहरूलाई एकीकृत बस्ती निर्माण गरी हस्तान्तरण गरिसकेको छ ।