नवलपरासी, असोज ३–

नवलपरासीको सिमा क्षेत्र महेशपुर नाकाबाट अवैध रुपमा नेपाल भित्र्याएर ल्याउदै गरेको कपडा (आज) मंगलबार वाईसीएलले नियन्त्रणमा लिएर प्रहरीलाई बुझाएको छ ।

लु १ ज ३३ ८९ नम्बरको भ्यानमा भन्सार छलेर भित्र्याईएको २७ बन्डल ३० लाखभन्दा बढीको सामान वाईसीएलले अरुणखोलाबाट कब्जा गरी दुम्कीवास प्रहरीलाई बुझाएको वाईसीएल नवलपुर संयोजक गुराँसले बताए । प्रहरीले सो सामाग्री भन्सार कार्यालयमा बुझाएको जनाएको छ । भ्यान चालकलाई समेत प्रहरीले नियन्त्रणमा लिएको छ ।

गत भदौमा सम्पन्न राष्ट्रिय सम्मेलन पश्चात वाईसीएल नेपालले सामाजिक सुधार, भ्रष्टाचार नियन्त्रण, कालोबजारी नियन्त्रण जस्ता सामाजिक कुरितीलाई निर्मल पार्नका लागि आफुहरु अभियानमा लागेको गुराँसले बताए । उनले चाडपर्वका बेला सर्वसाधारणहरुलाई विभिन्न बहानामा ठग्ने प्रचलन समेत रहेकाले वाईसिएलका युवाहरु विभिन्न ठाउँमा परिचालन गरिएको उनले बताए ।