चितवन, भदौं ३१–

बहुप्रतिक्षित नेपाली चलचित्र ‘छक्का पञ्जा २’ को रोड शो भोली (आईतबार) चितवनमा हुने भएको छ । पूर्वी नेपालबाट सुरु भएको रोड शो चितवनको नारायणगढस्थित नारायणी नदी किनारमा हुन लागेको हो ।

‘रोड शो’ को चितवनमा यु टर्न मार्केटिङ सोलुसन्स प्रा.लि.र चितवन ग्रीन लियो क्लवले व्यवस्थापन गरेको छ । ‘रोड शो’ को सम्पूर्ण तयारी पुरा भईसकेको चितवन ग्रीन लियो क्लवका निवर्तमान अध्यक्ष इ.पुस्कर कोइरालाले जानकारी दिनुभयो । ‘रोड शो’ लाई व्यवस्थित र भव्य बनाउन जिल्ला प्रशासन कार्यालय, उद्योग वाणिज्य संघ चितवन र भरतपुर महानगरपालिकासंग अनुमति लिएर काम गरिएको कोइरालाले बताउनुभयो ।

‘रोड शो’ भोली दिउँसो ३ बजेदेखि साँझ ७ बजेसम्म चल्ने क्लवका निवर्तमान अध्यक्ष कोइरालाले बताउनुभयो ।

बहुप्रतिक्षित चलचित्र ‘छक्का पञ्जा २’ को प्रमोशनका लागि ‘रोड शो’ आयोजना गरिएको हो । भदौं २९ गते पूर्वबाट सुरु भएको ‘रोड शो’ पश्चिममा गएर सकिने छ ।

‘रोड शो’ मा कलाकारहरु दिपकराज गिरी, जितु नेपाल (मुन्द्रे), केदार घिमिरे (माग्ने बुढा), गायक हेमन्त शर्मा, स्वरुप ढकाल, चलचित्रकी निर्देशक दिपाश्री निरौला, नायिका प्रियंका कार्की, वर्षा राउत र स्वस्तिमा खड्काको उपस्थिति रहने इभेन्ट म्यानेजर भिष्म संग्रौलाले जानकारी दिनुभयो ।