चितवन भदौं ३१–

थरुहट आन्दोलनका घाइते सन्जीत महतोको उपचारको सहयोगका लागि चितवनमा थारु भाषाको चलचित्र ‘कलपाना’को च्यारिटी शो गरिने भएको छ ।

आउँदो असोज ७ गते च्यारिटी शो गर्न लागिएको सन्जीत महतो राहत कोषले भरतपुरमा आज विहान पत्रकार सम्मेलनको आयोजना गरि जानकारी दिएको छ ।

चर्चित निर्देशक स्वर्गीय शिव रेग्मीले निर्देशन गर्नुभएको यस चलचित्र थारु भाषाको देशकै दोश्रो चलचित्र हो । २०४९ सालमा छायाँंकन गरिएको चलचित्र २०५० सालमा प्रर्दशन गरिएको थियो । यो चलचित्रलाई थारु समुदायले ऐतिहासिक चलचित्रको रुपमा लिने गरेका छन् । चलचित्रको गीत, संगीत र कथाबस्तु अहिले पनि उत्तिकै कर्णप्रिय र समयसान्र्दभीक रहेकाले यो चलचित्रलाई नै च्यारिटी शो गर्न लागिएको सन्जीत राहत कोषका संयोजक शरदकुमार महतोले जानकारी दिनुभयो ।

पर्यटकीय क्षेत्र सौराहास्थित थारु कल्चर हाउसमा हुने च्यारिटी शोका लागि ५ सय वटा टिकट विक्री गरिने राहत कोषले जनाएको छ । आर्थिक सहयोग संकलन गर्ने उद्देश्यले च्यारिटी शो गर्न लागिएकाले प्रति टिकट ५ सय रुपैयाँ मूल्य निर्धारण गरिएको छ । अहिले सम्म ३ सय भन्दाबढी टिकट विक्री भइसकेको थारु पत्रकार संघ चितवनका अध्यक्ष समेत रहनुभएका राहतकोषका सदस्य कारी महतोले जानकारी दिनुभयो । च्यारिटी शो सुरु हुनुअघि गायक मनोज महतो र अमित सिंह चौधरीको सांगेतीक प्रस्तुती रहनेछ । उनीहरुले नेपाली र थारु भाषाको गीत गाएर दर्शकलाई मनोरञ्जन दिनेछन् ।

को हुन् सन्जीत महतो ?

२०६५ मा भएको थरुहट आन्दोलनका क्रममा घाइते भएका रत्ननगर नगरपालिका–७ घर भएका सन्जीत महतोको स्वास्थ्य उपचार देखि उनको परिवारलाई दिगो आय–आर्जनको व्यवस्थापन गर्न निकै चुनौतीपूर्ण छ । त्यसैले उनको उपचार र आगामि दिनमा सहज बाटो होस् भनेरै सन्जीत राहत कोष स्थापना गरिएको हो । स्थानीय युवाहरुको सहभागीतामा गठन भएको कोषले अहिले सम्म झण्डै साढे २ लाख भन्दाबढी आर्थिक संकलन गरिसकेको छ । भरतपुर स्थित एलाईभ हस्पिटल एण्ड ट्रमा सेन्टरमा स्वास्थ्य उपचार भइरहेको सन्जीतको स्वास्थ्य अवस्थामा निकै सुधार आएको छ ।

केही दिनमा डिसचार्ज भएर घर फर्कीने तयारीमा रहेका सन्जीतको उचित व्यवस्थापनका लागि राहत कोषले आर्थिक संकलन गर्ने कार्यलाई तीब्रता दिएको छ । आर्थिक संकलन सँगै सन्जीत र उनका परिवार सँगै थारु समुदायका अगुवाहरुको बैठकले सन्जीतलाई दिगो आय आर्जन गर्न सकिने विकल्पहरुको विषयमा छलफल गरेर टुंगो लगाउने निर्णय समेत गरेको छ । सन्जीत राहतकोषका लागि स्वदेश तथा विदेशवाट आर्थिक सहयोग आउने क्रम जारी छ ।

आर्थिक अभावका कारण सन्जीत महतोले स्वास्थ्य उपचार पाउन सकेको थिएनन् । अहिले स्वास्थ्य उपचारसँगै दिगो व्यस्थापनको प्रयास हुन थालेपछि सन्जीत महतोको परिवारहरु समेत उत्साहीत देखिएका छन् । घाइते सन्जीत महतोको विग्रीदै गएको स्वास्थ्य अवस्थाको बारेमा झण्डै नौं वर्षपछि संचार माध्यममा सार्वजनिक भएपछि मात्रै उनको स्वास्थ्य उपचार प्रति चासो बढेको हो । स्थानीय युवाहरु उनको स्वास्थ्य उपचार सँगै दिगो व्यवस्थापनका लागि जुटेका छन् । थरुहट आन्दोलनमा होमिएका सन्जीतको प्रहरीको गोली लागेर गम्भिर घाईते भएका थिए । सोही घटना क्रममा प्रहरीकै गोली लागेर कमल चौधरी र विपिन खड्का शहिद भएका थिए । गोली लागेर ढलेका विपिनलाई उठाउन जाने क्रममा प्रहरीले सन्जीतको खुट्टामा गोली हानेको थियो ।

उनको उपचारका लागि सरकारले हालसम्म जम्मा ३२ हजार रुपैयाँ मात्रै सहयोग गरेको परिवारले जनाएको छ । त्यसपछि कुनै सहयोग आएको छैन् । सुरुमा उनको उपचार भने सरकारले गरेको थियो । सुरुमा ठिक हुँदै गएका सन्जीत पछि फेरी थला परेका हुन् । सन्जीत हाल ३१ वर्षका भएका छन् । उनको एक छोरा र श्रीमती छन् ।