चितवन, भदौ २६–

प्रथम ‘जेसिज कप’ फुटबलको उपाधी मनाङ मस्र्याङ्दी क्लवले हात पारेको छ ।

आज (सोमबार) नारायणगढको क्याम्पाचौरमा भएको फाईनल प्रतिस्पर्धामा विभागीय टिम शशस्त्र प्रहरी बललाई एपिएफलाई २–१ गोल अन्तरले पाखा लगाउँदै मनाङले उपाधीसंगै नगद ३ लाख ५० हजार रुपैयाँ प्राप्त गरेको छ । उपविजेतामा चित्त बुझाएको एपिएफले ट्रफीसंगै नगद १ लाख ७५ हजार प्राप्त गर्‍यो ।

विजेता र उप–विजेतालाई नेपाल जेसिजका राष्ट्रिय अध्यक्ष प्रकाश प्रसाद अधिकारीले पुरस्कार प्रदान गरे । फाईनल खेलमा मनाङले पहिलो हाफमै २–० को अग्रता लिएको थियो । एपिएफले पहिलो हाफमा गोल गर्ने केही राम्रा अवसरलाई सदुपयोग गर्न सकेन् । मनाङका लागि पहिलो हाफको १९ र ४० औं मिनेटमा सुजल श्रेष्ठले गोल गरे । दोश्रो हाफमा आक्रमक रुपमा प्रस्तुत भएको एपिएफका लागि १९ औं मिनेटमा हरी कार्कीले सान्त्वना गोल गरे । दोश्रो हाफमा पनि एपिएफले धेरै अवसर पाएको थियो । तर बललाई जाली चुमाउन नसक्दा मनाङलाई उपाधी सुम्पन बाध्य भयो ।

खेलमा एपिएफका हरी कार्की प्लेयर अफ दि म्याच घोषित हुँदै नगद ५ हजार पाए । प्रतियोगिताको प्लेयर अफ दि सिरिज मनाङका सुजल श्रेष्ठले प्राप्त गरे । प्लेयर अफ दि सिरिजको पुरस्कार नगद १० हजारसंगै उनले धेरै गोलकर्ताबाट थप १० हजार प्राप्त गरे । उत्कृष्ठ गोलकिपर मनाङकै दिनेश थापा घोषित भए । उनले पनि नगद १० हजार पुरस्कार पाए । उत्कृष्ट टिम घोषित झापा ११ ले नगद १० हजारनै प्राप्त गर्‍यो । गत १७ गतेदेखी सुरु भएको प्रतियोगितामा दुई विभागिय सहित १० टिमको सहभागीता रहेको थियो ।