चितवन,भदौं २१-

काठमाडौं जाने र काठमाडौंबाट बाहिरिने यात्रुलाई अचेल सबैभन्दा धेरै नारायणगढ–मुग्लिन सडकको अवस्था के होला भन्ने पिरलो हुन्छ । यात्रा गर्न लागेकाहरुको जिज्ञासा मेटाउन नारायणगढ–मुग्लिन सडक आयोजनाले काठमाडौंलगायत ठाउँठाउँमा डिजिटल सूचना बोर्ड राख्न लागेको छ । सो खण्डमा पहिरो गएर बाटो बन्द छ वा खुला छ जस्ता जानकारी बोर्डमा आउने छ ।

‘हामीले यस्ता सूचना बोर्डहरु सात ठाउँमा राख्न लागेका हौं । काठमाडौं नागढुंगामा दुई महिनाअघि नै राखेको हो । नारायणगढ–आँपटारीमा मंगलबार राख्यौं’ यो हप्ता मुग्लिन र हेटौंडामा पनि राख्ने छौं’ नारायणगढ मुग्लिन सडक आयोजनाका इन्जिनियर तथा सूचना अधिकारी शिव खनालले भने । नौबिसे, पथलैया र बुटबलमा पनि यस्तो सूचना बोर्ड राखिने छ ।

आयोजनाले वर्षायाममा पहिरोको जानकारी दिन यस्ता सूचना बोर्ड राख्न लागेको थियो । चैतमै प्रक्रिया सुरू गरेर चीनबाट बोर्डका सामग्रीहरु ल्याउन खोजिएको हो । तर, आउन समय लागेको आयोजनाका सूचना अधिकारी खनालले बताए । एउटा सूचना बोर्ड राख्न २२ लाख रूपैयाँ खर्च हुने छ । अर्थात् सूचना बोर्डका लागि मात्रै एक करोड ५४ लाख रूपैयाँ खर्च भएको छ ।

सौर्य उर्जाबाट बोर्ड चल्ने छ । बाटोको अवस्था के छ आयेजनाका अधिकारीहरुले इन्टरनेट भएको ठाउँबाट मोबाइल फोन सेट वा कम्प्युटरको मद्धतले बोर्डमा राख्नुपर्ने जानकारीहरु प्रवाह गर्ने छन् । ‘सूचना बोर्ड राखेको ठाउँमा नै पुगेर सूचना अपडेट गर्नुपर्छ भन्ने छैन । इन्टरनेट भएको ठाउँबाट मोबाइल फोन सेट वा कम्प्युटर मार्फत बोर्डमा राख्ने सूचना जारी गर्न सकिन्छ’ खनालले भने ।

सातवटै बोर्डका लागि एकै खालको वा फरकफरक सूचनाहरु राख्न मिल्ने सुविधा भएको खनालले बताए । पहिरो झरेको छ वा छैन, खुल्ने सम्भावना कति बेला छ जस्ता सूचनाहरु लगातार राख्न मिल्ने भएका कारण यात्रुहरुलाई ठूलो राहत हुने आशा राखेको खनालले बताए । सामान्य अवस्था भएका बेलामा ट्राफिक नियम पालना सम्बन्धी सूचनाहरु राखिने छन् ।

सडकखण्ड नजिकै रहेको नारायणगढ र मुग्लिनका साथै बुटवल र पूर्वमा पैथलैयामा सूचना बोर्ड राख्दा यात्रुहरुले त्यही अनुसारको योजना बनाउने छन् । सूचना बोर्डको आयु कम्तीमा १० वर्षको हुने खनालले जानकारी दिए ।

‘आयोजनाको काम सकिए पनि सूचना बोर्डहरु रहिरहने छन् । त्यो बेला पनि उपयुक्त सूचनाहरु राख्न काम लाग्ने छ’ इन्जिनियर खनालले भने । नारायणगढ मुग्लिन सडकलाई एसियाली मापदण्ड अनुरुपको बनाउन विस्तारको काम भइरहेको छ । सडक फराकिलो बनाउन ठाउँठाउँमा पहाड काट्ने काम भएको छ । पहाड काटेको ठाउँमा पहिरो गएर हैरानी हुने गरेको छ ।

पहिरो जाँदा लगातार ४३ घण्टासम्म बाटो बन्द भएको छ । पहिरोमा पुरिएर यात्रा गरी रहेका पाँच जनाको ज्यान गएको छ । त्यसैले ठाउँठाउँमा सूचना बोर्ड राखेर तत्कालको तत्कालै सूचना प्रवाह गर्ने व्यवस्था भए यात्रुहरुलाई सडकमा यात्रा गर्ने वा नगर्ने योजना बनाउन मद्धत मिल्ने आयोजनाले आशा राखेको छ ।

चितवनपोष्ट दैनिकवाट