पाल्पा,भदौ २० –

पाल्पाको बगनासकाली गाउँपालिकाको मालारानी, झिरुभञ्ज्याङ क्षेत्रको सडकमा डोरीले बाँधेर सवारीसाधन तान्नुपर्ने बाध्यता छ ।तानसेनदेखि चापपानी, यम्घा, दर्लमडाडालगायतका क्षेत्रमा पानी परेपछि चल्ने ठूला सवारीसाधन डोरीले बाँधेर तान्दै उकालो पार गर्नुपर्ने बाध्यता रहेको स्थानीय बासिन्दा सूर्यप्रकाश बस्याल बताउनुहुन्छ ।

मालारानी क्षेत्रमा सडक फराकिलो बनाउने काम असार महिनामा शुरु गरेकाले वर्षाका कारण सडममा हिलो भएर चिप्लो हुँदा कुनैपनि गाडी उकालो पार नहुने उहाँको भनाइ छ ।

तानसेन बसन्तपुरका रुपक्रान्ता बस्यालले अस्पताल आएकी वृद्ध आमालाई मोटरसाइकलमा बोकेर भिरुभञ्ज्याङसम्म पु¥याए पनि हिलाम्मे सडकको बीचमा पुगेपछि मोटरसाइकल बीचमा नै रोकियो । यम्घा पु¥याउन बिहानै हिँडेका बस्यालका आमा छोरालाई हिलाम्मे सडक पार गर्न समस्या भएपछि त्यहीबाट आमालाई हिँडाएर घरसम्म लैजान प¥यो ।

चापपानी मावि शिक्षक जीवलाल घिमिरेका अनुसार आधा बाटो पार भएपछि मैले पनि मोटरसाइकल कतै थन्क्याएर कतै राखेर फेरी पैदल जानुपर्छ, हिलाम्मे सडकमा मोटरसाइकल लिएर जान सकिँदैन । बीच बाटोमा लडियो भने स्कुल जाने की पोशाक बदल्न घर जाने भन्ने समस्याले आधा बाटो मोटरसाइकल, आधा पैदल गरी विद्यालय जनु–आउनु परेको उहाँको गुनासो छ ।

मोटर चल्ने बाटो विस्तार गरेपछि यस क्षेत्रमा पैदल हिँड्नसमेत समस्या भएको छ । स्कुले बालबालिकालाई बाटोमा लडिन्छ की भन्ने त्रासमै विद्यालय आवतजावत गर्न बाध्य छन् । उनीहरुका जुत्ता, कपडा एक दुई दिनमा धुनुपर्ने बाध्याले छोडेको छैन ।

बगनासकाली गाउँपालिका यम्घा वडा सचिव युवराज पाण्डेयका अनुसार केही दिनअघि बाटोको माटो हटाएपछि वर्षात्का कारण फेरि हिलाम्मे हँुदा सडकको यात्रा जोखिममय बनेको हो । दशैँ नजिकिँदा सडकमा पहिरो हटाए पनि वर्षात्ले उस्तै बनाउँदा यात्रुले सास्ती खेप्न बाध्य भएका हुन् । – रासस