चितवन, भदौं १७–

चर्चित नायिका झरना थापाले निर्देशन गरेको डेब्यु चलचित्र ‘ए मेरो हजुर २’ चितवनका हलहरुमा हाउसफुल भएको छ ।

शुक्रबारदेखि देशभर एकसाथ प्रदर्शनमा आएको चलचित्र ‘ए मेरो हजुर२ ’लाई दर्शकहरुले खुबै मन पराएका छन् । चितवनका हलहरुमा शनिबार सबै हाउसफुल भएका छन् । सबैभन्दा धेरै सिट क्षमता भएको इन्द्रदेव चलचित्र मन्दिरमा भने दर्शकहरुको ओभर फ्लो नै भएको थियो ।

आज शनिबार विहानको ९ बजे, दिउँसोको १२ बजे र ३ बजेको शो पुरै ओभर फ्लो भएको इन्द्रदेव चलचित्र मन्दिर नारायणगढका म्यानेजर हरि रेग्मीले नारायणी अनलाईनलाई जानकारी दिनुभयो । इन्द्रदेव हलमा ८ सय ३२ सिट क्षमता रहेको छ । यस्तै चितवनको क्वीएफएक्स जलमा, गणेश हल र पूर्वी चितवनका पर्सामा रहेको जनज्योतीहल हाउसफुल भएको हल संचालकले बताएका छन् ।

यस्तै राजधानीमा मल्टीप्लेक्समा सर्वाधिक शोज पाएको ‘ए मेरो हजुर २’ले पहिलो दिन उत्कृष्ट व्यापार गरेको थियो । यस्तै राजधानी बाहिर चितवनसंगै पोखरा, बुटवल, हेटौडा, धरानलगायतका सहरमा पनि चलचित्रले सानदार कलेक्सन गरेको छ । निक्कै प्रतिक्षा गरिएको यस चलचित्रमा साम्राज्ञी राज्यलक्ष्मी शाह, सलिनमान बनियाँ, सलोन बस्नेत, अम्बर सुवेदी, अनुराग कुँवर, बुद्दी तामाङ, अनुभव रेग्मी, विल्सनविक्रम राईलगायतका कलाकारको अभिनय छ ।

सुहाना इन्टरटेनमेन्टको व्यानरमा निर्मित ‘ए मेरो हजुर २’को कथा हरिहर अधिकारीले लेखेका हुन् । संजय लामाले खिचेको सिनेमाका पटकथाकार सामिप्यराज तिमेल्सिना हुन् । यस चलचित्रको निर्माण भने सुनिल कुमार थापाले गरेका हुन् ।