एनआईसी एशिया बैंक लिमिटेड नेपाल फाइनान्सियल रिपोर्टिङ स्टान्डर्ड (एनएफआरएस) अनुरुप वित्तीय विवरण प्रकाशित गर्ने पहिलो वाणिज्य बैंक बनेको छ । बैंकले गत आर्थिक वर्ष एक अर्ब ५२ करोड रुपैयाँ खुद मुनाफा आर्जन गरेको विवरण प्रकाशित गरेको छ । बैंकको नाफा अघिल्लो आर्थिक वर्षको तुलनामा आठ करोड १५ लाख रुपैयाँ बढी हो । अघिल्लो आर्थिक वर्षमा एनआईसी एशिया बैंकले एक अर्ब ४३ करोड रुपैयाँ खुद मुनाफा आर्जन गरेको थियो ।

१५ प्रतिशत हकप्रद शेयर र २० प्रतिशत बोनस शेयरबाट ८ अर्ब २ करोड रुपैयाँ चुक्ता पूँजी पुर्याएको एनआईसीले जगेडाकोषमा ४ अर्ब १९ करोड २८ लाख रुपैयाँ राखेको छ । एनआईसी एशिया बैंकले यस अवधिमा एक खर्ब ५१ अर्ब निक्षेप संकलन गरेर एक खर्ब २१ अर्ब कर्जा लगानी गरेको छ ।

बैंकले ब्याजबाटै १३ अर्ब २९ करोड आम्दानी गरेको छ भने ब्याज खर्च मात्रै ९ अर्ब ३३ करोड गरेको छ । जसबाट बैंकले ३ अर्ब ९६ करोड खुद ब्याज आम्दानी गरेको छ । त्यस्तै बैंकले दुई अर्ब २५ करोड ६७ लाख रुपैयाँ संचालन मुनाफा आर्जन गरेको छ ।

बैंकको निष्कृय कर्जा शुन्य दशमलव ०६ प्रतिशत, जोखिमयुक्त सम्पत्ति १२ दशमलव ५४ प्रतिशत, सिडि रेसियो ७४ दशमलव १२ प्रतिशत, प्रति शेयर आम्दानी १८ दशमलव ९४ प्रतिशत, स्प्रेडदर ५ दशमलव १० प्रतिशत रहेको छ ।

एनएफआरएस मोडल अनुसार बैंकले आफ्ना सेयरधनीहरुलाई ८२ करोड ४६ लाख रुपैयाँ बराबरको लाभांश बाड्न सक्ने क्षमता राख्दछ ।