गरिमा विकास बैंक लिमिटेडले सुनसरी र मोरङ्गका विभिन्न ४ स्थानमा शाखा विस्तार गरेको छ । बैंकले सुनसरीको ईटहरी र धरान तथा मोरङ्गको विराटनगर र टंकीसिनवारी शाखाको उद्घाटन गरेको हो ।

ईटहरी शाखाको उद्घाटन ईटहरी उप–महानगरपालिकाका मेयर द्धारिकलाल चौधरीले, धरान शाखाको उद्घाटन धरान उप–महानगरपालिकाकी उपमेयर मन्जु भण्डारी सुवेदीले, बिराटनगर शाखाको उद्घाटन बिराटनगर महानगरपालिकाका मेयर भिम पराजुलीले र टंकीसिनवारी शाखाको उद्घाटन बुढीगंगा गाउपालिकाका अध्यक्ष बालचन्द माझीले गरे ।

विकास बैंकले प्रदेश नं. १ अन्र्तगतका ८ वटा शाखा कार्यालय उद्घाटनको पूर्वसन्ध्यामा २०७५ जेष्ठ २३ गते ९ प्रतिशत व्याजदर र विभिन्न सुविधासहित गरिमा दम्पति बचत खाता र गरिमा कर्मचारी बचत खाता सञ्चालनमा ल्याएको छ ।

अब कहाँ खुल्दैछन् शाखा ?
काठमाडौंको लाजिम्पाटमा केन्द्रिय कार्यालय रहेको गरिमा विकास बैंक लिमिटेडका राजधानीमा ५ वटा शाखा कार्यालय सहित देशभर ५७ शाखा कार्यालय संचालनमा रहेका छन् । विकास बैंकले छिट्टै नै काठमाडौंको नयाँ बानेश्वर, ललितपुरको कुमारीपाटी, भक्तपुरको सुर्यविनायक, पोखराको रामबजार, रुपन्देहीको योगीकुटी, दाङ्गको घोराही, बांकेको नेपालगञ्ज, कैलालीको धनगढी र झापाको दमकमा समेत शाखा कार्यालय खोल्दैछ ।