हिमालयन जनरल इन्स्योरेन्स कम्पनी लिमिटेडले २०७९ असार २४ गतेसम्म २०० करोड रुपैयाँ प्रिमियम संकलन गर्न सफल भएको छ । उक्त कम्पनीको इतिहासमा नै पहिलो पटक २०० करोड प्रिमियम संकलन गर्न सफल भएकोमा झम्सिखेल स्थित होटल विभान्तामा एक संक्षिप्त कार्यक्रमको आयोजना गरिएको थियो ।

उक्त कार्यक्रममा कम्पनीका संचालक समितिका अध्यक्ष महेन्द्र कृष्ण श्रेष्ठले केक काट्नुका साथै सम्पूर्ण कर्मचारीहरुमा वधाई ज्ञापन गरेका थिए । कार्यक्रममा कम्पनीका प्रमुख कार्यकारी अधिकृत विजय बहादुर शाहले कर्मचारीहरुमा बधाई तथा धन्यबाद ज्ञापन गर्दै आफू अत्यन्त उत्साहित भएको र आगामी दिनहरुमा कम्पनीलाई नेपाली बीमा बजारमा उल्लेख्य र सबल कम्पनीको रुपमा प्रस्तुत गरिने बताए ।

सो कार्यक्रममा संचालक समितिका अध्यक्ष, संचालकहरु, कम्पनीका प्रमुख कार्यकारी अधिकृत तथा कर्मचारीहरुको उपस्थिति रहेको थियो ।