निषेधाज्ञा कै बीच तीन वटा कम्पनीको आईपीओ निष्काशन हुँदा सफ्टवेयर सिष्टममा चाप परेपछि नेपाल धितोपत्र बोर्डले यो अवधिभर आईपीओ निष्काशन गर्न अनुमति नदिने भएको छ । निषेधाज्ञामा तीन वटा कम्पनीको आईपीओ निष्काशन हुँदा सफ्टवेयरमा परेको चाप र बैंक देखिएको भिडभाड कम गर्न आईपीओ निष्कासनमा स्थगन गरिएको बोर्डका अध्यक्ष भिष्मराज ढुंगानाले बताए । ‘अहिलेलाई १७ गतेसम्म आईपीओ निष्कासन नगर्न निर्देशन दिइएको छ,’ उनले भने ।

निषेधाज्ञाको बेलामा आईपीओ निष्काशन गर्दा बैंकमा भिडभाड देखिनुका साथै कोभिडको यो त्रासमा लगानीकर्ताले दुःख पाएको भन्दै बोर्डले यस्तो निर्देशन दिएको हो । ‘लगानीकर्ताले सेयर भर्न कै लागि कुनै दुःख नपाउन भन्ने हाम्रो उद्देश्य हो,’ उनले भने ‘ घरमै बसेर सेयर भरिदिए राम्रो हुन्थ्यो ।’ यद्यपि अनलाइन सिष्टमबाट सेयर भर्दा समेत सफ्टवेयरमा प्रेसर पर्यो ।’

एकै पटक धेरै आईपीओ आउँदा मेरो सेयरले लोड धान्न नसकेको सीडीएससीले बताएको छ । एक पटकमा पाँच लाखसम्म आईपीओ निवेदन आउने गरेको र त्यस्तो अवस्थामा कुनै चाप नपरे पनि यस पटक एकै समयमा १३ लाख युजर आएकाले सिष्टममा चाप देखिएको हो ।

यसै साता एकै समयमा लिबर्टी जलबिद्युत, रिलायन्स लाईफ इन्स्योरेन्स र समाज लघुवित्तको आईपीओ खुलेको थियो । १६ वटा कम्पनीले आईपीओ निष्कासनका लागि बोर्डको पाइपलाइनमा बसेका छन् ।