खेल मार्फत सहकारी संस्थाको हार्दिकता र सहकार्य मजबुत बनाउने उद्देश्यले उज्यालो संपद बचत तथा ऋण सहकारी संस्था लिमिटेडको आयोजनामा ‘अन्तर सहकारी मैत्रीपूर्ण फुटसल प्रतियोगिता’ हुने भएको छ ।

काठमाडौँको गोकर्णेश्वर नगरपालिकाको वडा नं. ४, माकलबारी स्थित मनकामना फुटसल ग्राउन्डमा पुस २ र ३ गते हुने छ । ‘खेल मार्फत हार्दिकता र सहकार्यलाई थप मजबुत बनाउ’ मूलनाराका साथ यो कार्यक्रम गर्न लागिएको हो । सहकारी अभियानमा सम्बद्ध संस्थाहरुमा आपसी समझदारी, मित्रता एवम् निकट कार्यव्यवहार सम्बन्धलाई उजागर गर्न यस्ता प्रतियोगिता आयोजना गरिएको आयोजक संस्था अध्यक्ष रमेशप्रसाद तिमल्सिनाले बताए ।

अन्तर सहकारी संस्था विच हुने यो फुटसलले आगामी दिनमा सहकारीका विचमा थप सहकार्य गर्न मद्दत गर्ने आयोजक संस्थाले जनाएको छ ।

प्रतियोगितामा भाग लिएर प्रथम विजेता हुनेले ५० हजार, द्वितीयले ३० हजार र तृतीयले २० हजार प्राप्त गर्नेछन् । यसैगरी, सहभागी सबैलाई प्रशंसा पत्र सहितको सहभागिता प्रमाणपत्र प्रदान गरिने संस्थाका प्रमुख कार्यकारी अधिकृत नविन नेपालले जानकारी दिए ।

प्रतियोगितामा सहभागी हुन चाहने सहकारी संस्थाले यही मंसिर २५ गते (विहीबार ) कार्यालय समयमा नाम दार्ता गरी सक्नु पर्ने उज्यालो संपदले जनाएको छ ।