काठमाडौंको सामाखुसीमा भएको सुन लुटपाटमा संलग्न भनिएका आरोपीलाई पक्राउ गर्ने प्रहरी नायव निरीक्षक (सई)लाई पक्राउ गरिएको छ । सई नवराज इटनीलाई पक्रेर टेकुस्थित महानगरीय प्रहरी परिसर काठमाडौंमा राखिएको छ ।

पुस १० मा दोलखाका संयोग कार्की र सुवास तिमिल्सिनासहित ५ जनासँग सुन किन्ने ग्राहक बनेर दिपक नेपालीको समूहले सुन लुटेको दावी गरिएको छ । सुर्खेत घर भएका दिपकलाई घटना भएकै दिन महानगरीय प्रहरी प्रभाग नयाँ बसपार्कमा कार्यरत ईटनीले पक्रेका थिए ।

३० तोला सुन लुटपाटमा संलग्न आरोपीलाई महानगरीय प्रहरी वृत्त महाराजगञ्जका डिएसपी रोशन खड्कालाई जिम्मा लगाएका थिए । तर, खड्काले अनुसन्धान गर्नुको साटो नेपालीलाई सोही दिन छाडेको पीडितको आरोप छ । उता सई ईटनी अनुसन्धानको घेरामा पर्दा ‘लुटेरा’ पक्रेर बुझाउनेनियन्त्रणमा, डिएसपी खड्कालाई उन्मुक्ती किन ? प्रश्न खडा भएको हो ।

घटना छानविन गर्न महानगरीय प्रहरी कार्यालयले प्रहरी उपरिक्षक (एसपी) भोलाराज रावलको नेतृत्वमा समिति गठन गरेको छ । समितिमा डिएसपी प्रमेश विष्ट र निशान थापा सदस्य छन् ।

प्रहरीले घटनाबारे अनुसन्धान थालेपछि पीडित संयोग कार्की सम्पर्कविहिन भएका छन् । ‘लुटेरा आरोपी’ दिपक नेपाली फरार छन् । पीडित मध्येका सुवास तिमिल्सिनाले अनुसन्धानमा संलग्न प्रहरी अधिकृतसँग सुन नभएर मोवाईल मात्र लुटिएको बयान दिएका छन् । उनको बयानले घटनामा ट्विस्ट आएको अनुसन्धानले देखाएको स्रोतले जनाएको छ ।

डिएसपी रोशन खड्काले आफु उक्त घटनामा नमुझिएको बताउदै आए पनि उनको सम्लग्नता रहेको आशंका छ ।

यद्यपि, सई इटानीले आफ्नो कमाण्डर बसपार्कका निरीक्षकलाई रिपोर्ट नगरी महाराजगञ्ज प्रहरी वृत्त किन लगे ? यो खोजीको विषय हो ।  इटानीले करिब डेढ घन्टा केरकार गरेर महाराजगञ्ज लगेपछि लुटिएको भनिएको सुनबारे सोधीखोजी गरेको भनिएको छ ।

पीडित भनिएकाले सुनको बिल देखाउन नसकेपछि डीएसपी खड्काले पक्राउ परेका नेपालीलाई छाडेको भनिएको छ । तर, कार्कीले भने पीडितलाई नै उल्टै बिल देखाउन भन्दै मुद्दा चलाउने धम्की दिएको आरोप लगाएको खबर राजतिलक साप्ताहिकमा छ ।