नेपाल राष्ट्र बैंकका गभर्नर महाप्रसाद अधिकारीले मंगलबार सम्पत्ति विवरण सार्वजनिक गरेका छन्। उनको बैंक खातामा नेपाली र विदेशी मुद्रा दुवैमा निक्षेप रहेको छ।

उनी र परिवारको नाममा माछापुच्छ्रे बैंकमा एक लाख ६३ हजार ७६२ रुपैयाँ नगद छ भने नबिलमा २ हजार ३०२ अमेरिकी डलर छ। उनको नागरिक लगानी कोषमा १२ लाख २४ हजार ६०० रुपैयाँ छ।

गभर्नर नियुक्त भएको एक महिनाभित्र सम्पत्ति विवरण सार्वजनिक गरिसक्नुपर्ने कानुनी ब्यवस्था छ। अवकाश भएका गभर्नरले पनि एक महिनाभित्र विवरण सार्वजनिक गरिसक्नु पर्छ।उनीसँग दुई वटा मोटरसाइकल र एउटा टोयोटा कार छ। उनले ५९ लाख रुपैयाँ ऋण दिएका छन् भने ८ लाख १९ हजार ६०० रुपैयाँ नागरिक लगानी कोषबाट ऋण लिएका छन्। १८ हजारको क्रेडिट कार्ड ऋण पनि छ। दिएको कुल ऋणमध्ये ५० लाख रुपैयाँ मध्य-तमोरको सेयरमा हालेको पैसा हो। उनी संस्थापक सेयरधनी भएकाले ‘सेयर एडभान्स’ मा पैसा हालेका हुन्।

१४ लाख १० हजार रुपैयाँको टिभी, फ्रिज, वासिङ मेसिन, कम्प्युटर, प्लेयर, फोन सेट, एसी, आइप्याड, सोफा सेट रहेको उनको विवरणमा उल्लेख छ।

अधिकारीसँग नेपाल फिल्म, बाँसबारी लेदरेज, हरिसिद्धि इँटा र ज्योति स्पिनिङलगायत औद्योगिक क्षेत्रका कम्पनीहरुको ११ सय कित्ता सेयर छ। यसको कुल मूल्याङ्कन ४५ हजार २०० रुपैयाँ हो।

अधिकारीले नबिल, हिमालयन, सिद्धार्थ, बैंक अफ काठमाण्डू, सनराइज, एभरेष्ट, मेगा, नेपाल इन्भेष्टमेन्ट, एनएमबी, ग्लोबल आइएमइ, एनआइसी एसिया, मेरो माइक्रो फाइनान्स, नागरिक लगानी कोष, प्रिमियर इन्स्योरेन्सको पनि सेयर किनेका छन्। उनीसँग यी कम्पनीको २७ हजार १८४ कित्ता सेयर छ। यसको मूल्याङ्कन ४८ लाख ३७ हजार ३९० रुपैयाँ हुने उनले उल्लेख गरेका छन्। यो लागत मूल्य हो।

अधिकारीले नबिल ब्यालेन्स फण्ड-२ मा १८ लाख लगानी गरेका छन् भने चिलिमे, एचआइडीसिएल, सानिमा माइ, अपर तामाकोशीको २७ हजार ९२९ कित्ता सेयर किनेका छन्। यी सेयर उनले दोस्रो बजारबाट उठाएका हुन्। यसको मूल्याङ्कन ४० लाख १७ हजार ५०० रुपैयाँ हुन्छ। यो लागत मूल्य हो।

अधिकारीसँग २७ तोला सुनका गहना छन् भने ५० तोला चाँदीका गहना छन्। १८ हजार नगद घरमा छ। उनले सुनचाँदी पैतृक, विवाह र खरिदबाट आर्जन गरेको जनाएका छन्।

आफ्नो र श्रीमतीका नाममा जग्गा जमिन छ। साबिकको सैंबु गाविसमा उनीसँग २७ आना ३ पैसा २ दाम जग्गा छ। १६ आना बराबर एक रोपनी हुन्छ। यो दुई वटा कित्तामा छ। उनले विराटनगरको घरजग्जा बिक्री, सापटी र बचतबाट किनेको उल्लेख गरेका छन्। यसको लागत मूल्य १७ लाख रुपैयाँ हो।

ललितपुरको छप्पीमा पनि जग्गा छ। एउटा कित्ता ४ रोपनी १० आनाको छ भने अर्को २ रोपनी १५ आनाको छ। यसैगरी अर्को एउटा जग्गा २ रोपनी ६ आनाको छ। यसको लागत मूल्य ९० लाख ९७ हजार रुपैयाँ छ। हेटौंडामा पनि उनले जग्गा किनेका छन्। झापाको सुरुङ्गामा पनि जग्गा जमिन छ। यसबाहेक २२ सय वर्गफिटको जग्गा पनि छ। सञ्चयकोष सापटी, बैंक ऋण र बचतबाट उनले यो सम्पत्ति जोडेका हुन्। सम्पत्ति श्रीमती सरिता अधिकारी पोखरेलको नाममा छ।