ऋण दिने पैसा जति सरकारी ढुकुटीमा थन्किएपछि बैंकहरु भने ऋण दिने पैसा नभएर फिटफिट परेका छन् । सरकारले पुँजीगत खर्च गर्न नसक्दा गत भदौसम्ममा राष्ट्र बैंकमा रहेका सरकारका विभिन्न खातामा १ खर्ब ७५ अर्ब  ८७ करोड (स्थानीय खातामा रहेको ३६ अर्ब ३६ करोड समेत) थन्किएको छ । आर्थिक वर्षको शुरुमा पुँजीगत खर्च बढ्न नसक्दा यो यति धेरै रकम ढुकुटीमा जम्मा भएको हो । विगतका वर्षमा पनि आर्थिक वर्षको शुरुमा पुँजीगत खर्च हुन सकेको थिएन् । तर, यसपटक झनै कम खर्च हुँदा ठूलो रकम ढुकुटीमा जम्मा हुन पुगेको हो ।

सरकारी ढुकुटी रहेको पैसा खर्च हुन नसक्दा बैंकमा लगानीयोग्य रकम अभाव भएको नेपाल बैंकर्स संघका पूवअध्यक्ष अनिलकेशरी शाहको भनाइ छ । गाउँमा दिने वित्तीय साक्षरता अब सिंहदरबारतिर पनि दिनुपर्ने अवस्था आएको नबिल बैंकका प्रमुख कार्यकारी अधिकृतसमेत रहेका शाहले बताए ।

पैसा जति सबै सिंहदरबारको घ्याम्पोमा बसेपछि सरकारले राखेको ८ प्रतिशतको वृद्धि सम्भव नहुने बैंकरहरुको भनाइ छ । अहिले ऋण दिने रकमको अभाव बैंकहरुलाई छ । तर, सरकारी ढुकुटीमा रकम थन्किएर बसेको छ । अहिले तरलताको अभाव समाधान निकाल्ने भनेको बैंकरले ऋण कम दिएर हो । ऋण कम दिँदा सरकारको आर्थिक वृद्धि लक्ष्य पूरा हुन नसक्ने उनीहरुको भनाइ छ ।

१०० रुपैयाँको निक्षेप संकलन हुँदा बैंकहरुले ८० रुपैयाँ लगानी गर्ने हो । बैंकले २० रुपैयाँ लगानी गर्न पाउँदैन् । त्यो २० रुपैयाँ सुरक्षणका लागि राष्ट्र बैंकमा राख्नुपर्छ । ऋण नदिँदा तरलता अभाव त समाधान होला । तर, देशको समस्या समाधान नहुने बैंकरको भनाइ छ । ऋण लगानी नगर्दा ८ प्रतिशतको आर्थिक वृद्धि दरको लक्ष्य हासिल हुँदैन । अहिलेको समस्या समाधान गर्दै उच्च आर्थिक वृद्धि हासिल गर्न सबै संयमित हुनुपर्छ र सरकारले पनि खर्च गर्नु उनीहरुको तर्क छ । नेपाल बैंकर्स संघको तथ्यांकअनुसार, वाणिज्य बैंकले कार्तिक १ गतेसम्म २९ खर्ब ७१ अर्ब निक्षेप संकलन गरेका छन् भने सोही अवधिसम्म २६ खर्ब २६ अर्ब लगानी गरेका छन् ।