कालीमाटीका तरकारी व्यापारीले अनुगमन गर्न खटिएको टोलीको काममा अवरोध गरेका छन् ।

व्यापारीले वाणिज्य, आपूर्ति तथा उपभोक्ता संरक्षण विभागको टोलीको कामकाजमा आज कालीमाटी बजार अनुगमनका क्रममा अवरोध पु¥याएको हुन् । व्यापारीले विनाजानकारी अनुगमनमा आएको भन्दै काममा अवरोध गरेका थिए ।

उद्योग, वाणिज्य तथा आपूर्तिमन्त्री मातृका यादवले कालीमाटी पुगी त्यहाँको अवस्थाबारे जानकारी लिनुभएको थियो । मन्त्री यादवले उपभोक्ताको अधिकार सुनिश्चित गर्न गएको अनुगमन टोलीलाई अवरोध गर्ने जोकोहीलाई पनि कारवाही गरिने बताउनुभयो ।

“व्यापारीले नियमपूर्वक व्यापार गरेको भए अनुगमन टोलीमाथि दुव्र्यवहार हुँदैनथ्यो,” उहाँले भन्नुभयो, “गतल तरिकाले व्यवसाय गरेकै कारण टोलीलाई गलत व्यवहार गरेका हुन् । त्यसको छानबिन हुन्छ ।” मन्त्री यादवसँगै उद्योग सचिव चन्द्रकुमार घिमिरे पनि बजार अनुगमन गर्न जानुभएको थियो ।

अनुगमन टोलीले यसअघि धादिङ, चितवन, मकवानपुरलगायत जिल्लामा पुगी किसानले पाउने मूल्य र उपभोक्ताले तिर्ने मूल्यबारे जानकारी लिएको थियो । अनुगमनका क्रममा टोलीले आज बिहान कालीमाटीबाट तरकारी ढुवानी गरेको दुई गाडी नियन्त्रणमा लिएको थियो ।

जानकारी लिने क्रममा अनुगमन टोलीमाथि दुव्र्यवहार भएको उद्योगमन्त्रीका स्वकीय सचिव रविकिरण यादवले जानकारी दिनुभयो । सोक्रममा कालीमाटी फलफूल तथा तरकारी व्यवसायी सङ्घका अध्यक्ष भरत खतिवडालाई पक्राउ गरिएको उहाँले बताउनुभयो ।