नेपालको औधोगिक क्षेत्र अर्थात् उधोगमा ५५ अर्बको वैदेशिक लगानी भित्रिएको छ । उधोग विभागका तथ्याकं अनुसार असारसम्मको समयमा सबैभन्दा बढी लगानी गर्ने विदेशी मुलुकमा चीन रहेको छ । उसले आर्थिक वर्ष २०७४—७५ असार सम्मको समयमा १६० वटा उधोग दर्ता गरेको छ जसको कुल लगानी भनेको ४६ अर्ब ५० करोड ६ लाख रहेको छ ।

चीनले यो वर्षको सुरुवाती समयमा गत आर्थिक वर्षभन्दा करिब ४० अर्बभन्दा बढी रकम नेपालमा लगानी गरेको हो । चीनले गत आर्थिक वर्ष ६ अर्ब ३२ करोड ६ लाख लगानी गरेको थियो ।

यस्तै नेपालका लागि दोस्रो ठूलो लगानीकर्ता भनेको भारत रहेको छ । उसले ५३ वटा उधोग दर्ता गर्दै ५ अर्ब ९८ करोड लगानी गरेको छ । लगानीको तेस्रो स्थानमा भने अमेरिका रहेको छ उसले ३५ वटा उधोगमा १ अर्ब ८८ करोड लगानी गरेको छ ।

उद्योग विभागका निर्देशक प्रशान्त बोहराले भने नेपालमा विदेशी लगानी बढ्नु मुलुक र जनताको लागि अनुकुल रहेको भन्दै विदेशी लगानी बढ्नुमा सरकारले आर्थिक विकासको मुख्य एजेन्डाबनाई वैदेशिक लगानी भित्राउनु खोज्नु रहेको बताए ।

हाल मुलुकमा स्थायी सरकार , बिजुली सडक लगायत भौतिक संरचनाको सुविधा हुनुले पनि औधोगिक वातावरण बनेको हुदाँ विदेशी लगानीकर्ताको रुचि देखिएको निर्देशक बोहोराको भनाई छ ।

असारसम्मको तथ्याकं हेर्दा नेपालमा लगानी गर्न जापान, दक्षिण तथा उत्तर कोरियाल फ्रान्स लगायत कुल ४५ मुलुकले उधोग सञ्चालनको लागि स्वीकृति लिई सकेको विभागले जनाएको छ । विभागका अनुसार पछिल्लो समय नेपालीमा लगानी गर्न चाहना विदेशी राष्ट्रको संख्या बढ्दै गएको जनाएको छ ।

हाल विदेशी लगानीकर्ताको आकर्षक क्षेत्र भने उर्जा क्षेत्र रहेको छ भने सेवा क्षेत्र भने खुम्चिएको छ ।
विभागका अनुसार चालु आर्थिक वर्षमा उर्जा क्षेत्रमा ३६ अर्ब २५ करोड १ लाख रुपियाँ बराबरको उधोग र ६ अर्ब ५७ करोड २ लाख रुपैयाँ बराबरको म्यानुफ्याक्चरिङ उद्योग दर्ता भएको छ ।
अन्य उधोगहरुमा भने उत्पादन, पर्यटन र सेवा क्षेत्रका दर्ता भएका छन् ।

यता सेवा क्षेत्रमा वैदेशिक लगानी खुम्चिएको छ । गत वर्ष ४ अर्ब ९९ करोड ८ लाख रुपियाँ लगानीको उद्योग दर्ता भएकोमा यस वर्ष खुम्चिएको छ । यस वर्ष २ अर्ब १७ करोड ३ लाख रुपियाँ बराबरको मात्र उद्योग दर्ता भएको छ । दर्ता भएका वैदेशिक लगानीको उद्योगमा १३ हजार ८ सय ९९ जनाले रोजगारी पाउनेछन् । जसमध्ये सबैभन्दा बढी चीनियाँ लगानी रहेको उधोगमा ६ हजार ३ सय ६९ जनाले रोजगार पाउनेछन् ।