महालक्ष्मी विकास बैंकका डेबिट कार्ड प्रयोग गर्ने ग्राहकले नेपाल मेडिसिटी अस्पतालको सेवा शुल्कमा छुट पाउने भएका छन् । बैंकले आफ्ना ग्राहकलाई स्वदेशमै गुणस्तरीय स्वास्थ्य सेवा प्रदान गर्ने हेतुले अस्पतालसँग साउन ६ गते सम्झौता गरेको हो ।

उक्त सम्झौता अनुसार बैंकका डेबिट कार्ड प्रयोग गर्ने ग्राहकले नेपाल मेडिसिटीमा उपचार गराउँदा सेवाशुल्कमा छुट पाउनेछन् । सो सम्झौतापत्रमा बैंकका प्रमुख कार्यकारी अधिकृत कृष्णराज लामिछाने र अस्पतालका महाप्रबन्धक बिजय रिमालले हस्ताक्षर गरेका छन् ।

सम्झौता अनुसार बैंकका ग्राहक वर्गले उपचार खर्चमा ७ प्रतिशत छुट पाउनेछन् ।यसका साथै बैंकका कर्मचारी तथा कर्मचारीका परिवारले नेपाल मेडिसिटीको सेवाशुल्कमा १० प्रतिशत छुट प्राप्त गर्नेछन् ।

करिव ४ लाख ४० हजार ग्राहक वर्गहरुले नेपाल मेडिसिटीमा उपचार गराई सेवाशुल्कमा छुट प्राप्त गरी लाभान्वित हुन सक्ने बैंकले जनाएको छ । सो छुट पाउनका लागि ग्राहकले अनिवार्य रुपमा बैंकको डेबिट कार्ड लिएको हुनुपर्ने बैंकले जनाएको छ ।

बैंकले देशका ७३ वटा शाखाहरुबाट बैंकिङ्ग सेवा प्रदान गर्दै आएको छ ।