विभिन्न वाणिज्य बैंकहरूको नबिकेको हकप्रद शेयर टेण्डरमार्फत् खरिद गरी कर्मचारी सञ्चय कोष बैंक र वित्तीय संस्थाहरूमा आफ्नो अस्तित्व देखाउन पछिल्लो समय सफल हुँदै गएको छ ।

हालै प्रभु बैंक समूहअन्तर्गत रहेको प्रभु बैंक लिमिटेडको नबिकेको हकप्रद शेयर कर्मचारी सञ्चय कोषले खरिद गरेर प्रभु समूहमा छिरेको छ । यसभन्दा अगाडि उसले सिभिल बैंकको पनि नबिकेको हकप्रद शेयर खरिद गरेको थियो ।

विभिन्न वाणिज्य बैंकरूमा केही प्रतिशत शेयर किन्दै आएको कर्मचारी सञ्चय कोषले पछिल्लो समय देवीप्रसाद भट्टचन अध्यक्ष रहेको प्रभु बैंकको शेयर खरिद गरेको हो ।

ग्राण्ड बैंक र किष्ट बैंक मर्जर भएर बनेको नेपालकै सबैभन्दा ठूलो वाणिज्य बैंकमध्ये प्रभु बैंक पर्दछ । प्रभु बैंकको सर्वसाधारणतर्फको शेयर साधारण लगानीकर्ताहरूले किनेका छन् भने संस्थापक शेयर साना लगानीकर्ता र कर्मचारी सञ्चय कोषले किनेको हो । बोलपत्र आवेदनको लागि न्यूनतम १००० कित्तादेखि अधिकतम सम्पूर्ण कित्तासम्म व्यवस्था गरिएको थियो ।

बैंकको संस्थापक शेयरमा अधिकतम प्रति कित्ता एक सय १६ रुपैयाँसम्मका दरले आवेदन परेको थियो । अधिकांश शेयर एक सय रुपैयाँ दरमै बिक्री भएको बैंकले बताएको छ । साधारण शेयर भने एक सय ९७ रुपैयाँ ४० पैसासम्म कबुल भएका छन् । बैंकले न्यूनतम एक सय ५७ रुपैयाँ ६० पैसासम्ममा साधारण शेयर बिक्री गरेको छ ।

हकप्रद बिक्रीसँगै बैंकको चुक्ता पूँजी ८ अर्ब २३ करोड रुपैयाँ पुगेको छ । बैंकले चालु आर्थिक वर्षको चैतसम्ममा ८६ करोड ७१ लाख रुपैयाँ नाफा गरेको छ भने जगेडा कोषमा तीन अर्ब रुपैयाँ भन्दा धेरै रकम जम्मा गरेको देखिन्छ । यस बैंकको सीइओमा सबैभन्दा कान्छा बैंकर अशोक शेरचन रहेका छन् । राजतिलक साप्ताहिक