चितवन,कार्तिक १८-

नेपाल तमू विद्यार्थी छोँज धीँ जिल्ला कार्य समिति चितवनले शनिबार भरतपुर तीनखोलेस्थित महाबौद्ध गुम्बा परिषरमा सरसफाइ गरेको छ । गुम्बा एउटा धार्मिक संस्था मात्रै नभई धेरै मानिसहरू घुम्नसमेत आउने ठाउँ भएकोले सरसफाइ गरिएको छोँज धीँले जनाएको छ । बौद्ध धर्मावलम्बीहरूका लागि दैनिकजसो पूजापाठ भइरहने स्थानमा फोहोर बढ्दै गएकोले सरसफाइ गरिएको छोँज धीँकी उपाध्यक्ष सुनिता गुरूङले जानकारी दिइन् ।

गुम्बा परिषरमा भएका सबै संघसंस्थाहरूसँगको समन्वयमा सरसफाइ गरिएको उनले बताइन् । कार्यक्रममा गुम्बा परिषरमा भएका संघसंस्थाका प्रतिनिधि तथा विभिन्न क्याम्पसका इकाइ समितिको सहभागीता रहेको थियो । विद्यार्थीले गरेको कार्यक्रम सह्राहनीय भएको भन्दै बौद्ध धर्म सेवा समिति चितवनका अध्यक्ष इमानबहादुर गुरूङले गुम्बा परिषर सबैको साझा संस्था भएकोले यसको संरक्षण, सम्बद्र्धन र सरसफाइमा सबैले उत्तिकै ध्यान दिनुपर्ने बताए ।

तमुस्यो ह्युल छोँज धीँ चितवनकी अध्यक्ष योगमाया गुरूङले विद्यार्थीहरूको यो कार्यक्रमले अभिभावकीय संस्थाहरूसँगको सम्बन्ध झनै बढ्दै जाने धारणा राखिन् । चितवन जिल्लाको गुरूङ समुदायको लागि नेपाल तमू विद्यार्थी छोँज धीँको योगदान मह¤वपूर्ण रहेको उनले बताइन् । आफ्नो सन्तानबिना अभिभावक अगाडि बढ्न नसक्ने भन्दै उनले वर्षौँदेखि विद्यार्थीले अभिभावकहरूलाई गरेको सहयोगको स्मरण गरिन् । यस्तै जयबुद्ध अस्पताल प्रालिका निर्देशक लोकबहादुर गुरूङले चितवन जिल्लामा तमू विद्यार्थी छोँज धीँको भूमिका अत्यन्तै महत्वपूर्ण रहेकोले विद्यार्थीहरूको हरेक कार्यक्रममा आवश्यक परेमा सहयोग गर्न तयार रहेको बताए । जिल्लामा मात्रै नभई नेपालकै लागि चितवन जिल्लाको तमू विद्यार्थी धेरै अगाडि रहेको उनको भनाइ थियो ।

नेपाल तमू विद्यार्थी छोँज धीँका केन्द्रीय बरिष्ठ उपाध्यक्ष विमश गुरूङले पनि नेपालमा तमू विद्यार्थीको मूल्यांकन गर्ने हो भने चितवन जिल्लाको विद्यार्थी सबैभन्दा अगाडि आउन सक्ने दावी गरे । विद्यार्थीले आफ्नो भाषा, धर्म, संस्कार, संस्कृति संरक्षण र सम्बद्र्धनका लागि हरेक वर्ष विभिन्न कार्यक्रम गर्दै आइरहेको छ । तीबाहेक संस्कृति संरक्षणका लागि हरेक वर्ष तमू ल्होछार पर्वमा साँस्कृतिक कार्यक्रमको जिम्मेवारीसमेत तमू विद्यार्थी छोँज धीँले नै सम्हाल्दै आइरहेको छ ।