सिरहा, असोज २४ –

सिरहाको कर्जन्हा नगरपालिका–१० प्रयागपुरमा सोमबार राति एक युवकको धारिलो हतियारले घाँटी रेटी हत्या भएको छ । आफ्नै घरमा सुतिरहेका बेला राति ३५ वर्षका शशिभुषणप्रसाद साहको हत्या भएको प्रहरीले जनाएको छ ।
सोमबार राति अवेर मिर्चैयाबाट साथीहरुसँग रक्सी खाएर आएका साह घरको भुइँतलामा एक्लै सुतेका थिए । साहको सुतेकै ठाउँमा हत्या भएको इलाका प्रहरी कार्यालय मिर्चैयाका डिएसपी गज्जुसिद्धि बज्राचार्यले जानकारी दिनुभयो । माथिल्लो तल्लामा सुतिरहेकी श्रीमती राति साढे १ बजे तिर शौचगर्न तल झर्दा श्रीमान सुतेको घरको ढोका खुल्लै देखेपछि गई हेर्दा श्रीमान मृत अवस्थामा देखेको प्रहरीले जनाएको छ ।
प्रहरीले हत्यामा संलग्नहरुको खोजी भइरहेको जनाएको छ । साहको शव पोष्टमार्टमका लागि लहानमा रहेको अस्पताल लगिएको छ । साह केही महिनाअघि मात्र हात हतियार तथा खरखजाना मुद्दामा जेल सजाय भुक्तान गरी घर फर्किएका थिए ।
असोज २ गते भएको स्थानीय तहको चुनावमा साहकी श्रीमती नेकपा एमालेको तर्फबाट वडा सदस्यमा उम्मेवादर बन्नुभएको थियो । यसैलाई लिएर विपक्षीले आफ्नो श्रीमानको हत्या गरेको हुनसक्ने साहकी श्रीमतीले आरोप लगाउनु भएको छ । साहका दुई छोरा र दुई छोरी छन् ।