धनगढी,भदौ २५ –

बलात्कारी बाबाकी छोरी भनिएकी हनीप्रीत नेपालमा भएको खबरसँगै उनी नेपालमा कहाँ छिन् भन्ने चर्चा चुलिएको छ । डेरा सच्चा सौदा प्रमुख राम रहीमकी छोरी हनीप्रीतको गाडी नेपाल भारत सीमामा भेटिएको हरियाणा प्रहरीले पुष्टि गरेको छ । सीमामा गाडी भेटिएकाले उनी नेपाल छिरेको हुन सक्ने अनुमान गरिएको छ ।

नेपालको कैलाली जिल्लासँग सिमाना जोडिएको भारतको जिल्ला लखिमपुर खिरीको नेपाल भारत सीमामा भेटिएको कार हनीप्रीतको भएको हरियाणा पुलिसको दावी छ । हरियाणा पुलिसका एएसपी घनश्याम चौरसियाले हनीप्रितको खोजीका लागि २ जना अफिसर लखिमपुर खिरीको गौरीफंटा आएको बताएका छन् । ती दुई अफिसरले गौरीफंटा चौकीमा हनीप्रीत नेपाल गएको हुन सक्ने बारे अनुसन्धान थालेको चौरसियाले बताएका छन् ।

हनीप्रीतविरुद्ध हरियाणा पुलिसले लुकआउट नोटिस जारी गरेको छ । उनीविरुद्ध राजद्रोहको मुद्दा पनि दर्ता भएको छ । हनीप्रीत बाबालाई सजाय सुनाइएको दिनदेखि नै बेपत्ता छिन् । यसपछि बाबा राम रहीमले कैयौं पटक हनीप्रीतसँग भेट्ने इच्छा जनाएका छन् । तर, उनको यो मागलाई पटक पटक खारेज गरिएको छ । हालै राम रहीमले प्रहरी अधिकारीहरुलाई आफूले भेट्न चाहेका १० जनाको नाम भएको लिस्ट दिएका थिए । यो लिस्टमा पहिलो नाम हनीप्रीतको छ । अर्कोतर्फ बाबाले अहिलेसम्म आफ्नी पत्नीसँग भेट्ने इच्छा गरेका छैनन् ।