नेपाल आयल निगम लिमिटेडले सिनामंगलस्थित त्रिभुवन विमानस्थल नजिकको हवाई इन्धन डिपो नयाँ स्थानमा स्थानान्तरण गर्ने प्रक्रिया अघि बढाइएको छ । २०८१ माघ १६ गतेको मन्त्रिपरिषद् निर्णयअनुसार स्थानान्तरण गर्ने नीतिगत निर्णय गरेसँगै यो डिपो गुहेश्वरीस्थित नेपाली सेनाको गोल्फ कोर्स भएको स्थानमा सार्न लागिएको छ । क्यानले विमानस्थल विस्तार गर्ने क्रममा ट्याक्सी वे र ट्याक्सी वे स्ट्रिप निर्माण गरिरहेको छ । यो ट्याक्सी वे र ट्याक्सी वे स्ट्रिप निर्माण गर्ने क्रममा सिनामंगल डिपो सार्नुपर्ने अवस्था आएको हो । नागरिक उड्डयन प्राधिकरण(क्यान)ले विमानस्थलको उत्तर पश्चिमको गुहेश्वरी गौचरस्थित गोल्फ कोर्स नजिकैको खाल्डो भएको क्षेत्रमा निगमको हवाई इन्धन डिपो निर्माण गर्न ११० रोपनी (५५ हजार ९ सय ५९ वर्गमिटर) जग्गा चार किल्ला छुट्टयाएर अनौपचारिक रुपमा हालै उपलब्ध गराएको छ ।

यो डिपो सार्न तयार भएको विस्तृत परियोजना प्रतिवेदन (डिपीआर) आज बिहीबार सार्वजनिक भएको छ । यो डीपीआर त्रिभुवन विश्वविद्यालय इन्जिनियरिङ अध्ययन संस्थानको कन्सल्टेन्सी सेवाले तयार परेको हो। डीपीआर प्रतिवेदन आज सिनामंगल हवाई इन्धन डिपोमा आयोजित एक कार्यक्रमबीच हस्तान्तरण गरिएको हो । त्रिभुवन विश्वविद्यालय इन्जिनियरिङ अध्ययन संस्थानका सहायक डिन डाक्टर सुरज लामिछानेले उक्त डीआरपी प्रतिवेदन सिनामंगल डिपोको प्रमुख यादवलाई हस्तान्तरण गरेका छन् ।

नयाँ डिपोको प्रविधि र पूर्वाधार

• नयाँ डिपो अत्याधुनिक प्रविधिसहित पूर्ण रूपमा स्वचालित (एल३ लेवल अटोमेसन ) हुनेछ। जसअनुसार यस्ता सुविधा भएको भौतिक पूर्वाधार निर्माण गरिनेछ ।
• ५ वटा भर्टिकल ट्याङ्क निर्माण हुनेछन्, जसमा प्रत्येकको क्षमता ३००० के.एल. हुनेछ।
• इन्धन लोडिङ तथा अनलोडिङका लागि ६–८ वटा Bay तयार गरिनेछ।
• अन्तर्राष्ट्रिय उडानका जहाजमा इन्धन भरिने ७ वटा पिट हाइड्रान्ट रिफ्युलिङ सिस्टम र २ वटा रिफ्युलिङ डिस्पेन्सर रहनेछ।

सुरक्षा पूर्वाधार सुदृढ हुने :
नयाँ डिपोमा सुरक्षा मापदण्डहरूलाई उच्च प्राथमिकता दिइएको छ।

डिपोभित्र निम्न पूर्वाधार रहनेछन्:

• २१०० किलोलिटर क्षमताको २ वटा स्टाटिक वाटर ट्याङ्क
• पूर्ण रूपमा स्वचालित फायर फाइटिङ सिस्टम
• अमेरिकन पेट्रोलियम इन्स्टिच्युट र आयल इन्डष्ट्रिज सेफ्टी डाईरेक्टी
• मापदण्ड लगायत अन्तर्राष्ट्रिय सुरक्षा मापदण्डको पूर्ण पालना
• यस अतिरिक्त, प्रशासनिक भवन, प्रयोगशाला भवन, मानव संसाधन युनिट, सम्भार र भण्डारण केन्द्र समेत स्थापना गरिनेछ। डिपोको सुरक्षाका लागि छुट्टै गेट र चौकीसमेत रहने व्यवस्था मिलाइनेछ।
  योजनाको लागत

नयाँ डिपो निर्माणका लागि अनुमानित लागत ६ अर्ब ५४ करोड २९ लाख ५ हजार रुपैयाँ छ । यसमा सम्पूर्ण संरचना निर्माण, स्वचालित प्रणाली, सुरक्षात्मक पूर्वाधार र आवश्यक उपकरण खरिद समावेश छन् । हालसम्म डिपो निर्माणस्थलमा चार किल्ला छुट्याएर झाडी हटाएर साइट क्लियरेन्स कार्य अघि बढाइएको छ । विस्तृत परियोजना प्रतिवेदनको अध्ययन गरेर चालु आर्थिक वर्ष २०८२/८३ बजेट विनियोजन गरेर आगामी भदौ महिनामा अन्तराष्ट्रिय टेण्डर आह्वान गर्ने योजना रहेको सिनामंगल डिपोको प्रमुख प्रदीप यादवले जानकारी दिए । यो डिपोको निर्माण सम्पन्न गर्ने अवधि आगामी वर्ष २०८४ मंसिर तोकिएको छ।

नेपाल आयल निगम हवाई इन्धन डिपो सिनामंगलका कार्यालय प्रमुख इञ्जिनियर प्रदीप कुमार यादवका अनुसार नयाँ डिपो पूर्ण रूपमा सुरक्षित, प्रविधियुक्त र दीर्घकालीन समाधान हुने किसिमले निर्माण गरिनेछ। ‘अन्तर्राष्ट्रिय मापदण्डअनुसारको सुरक्षित र प्रविधियुक्त डिपो निर्माण गर्न लागेको हो’, यादवले बताए । कार्यक्रममा डिपो प्रमुख यादवले नेपाल नागरिक उड्डयन प्राधिकरणले निगमको सिनामंगलस्थित ३२ रोपनी जग्गा कौडी भाउमा मूल्यांकन गर्न नमिल्ने बताए । क्यानका महानिर्देशक प्रदीप अधिकारीले संस्कृत, पर्यटन तथा नागरिक उड्डयन मन्त्रालयको बैठकमा निगमको ३२ रोपनी जग्गालाई कम मूल्यांकन(कौडिको भाउ) मूल्यांकन गर्नु पर्ने विषय उठाइएको यादवको भनाइ छ ।